ಸೃಷ್ಟಿ ರಹಸ್ಯ
ಬ್ರಹ್ಮಾಂಡವ ಸೃಷ್ಟಿಸಿದವರಾರು
ಕೋಟ್ಯಾಂತರ ಜೀವರಾಶಿಗಳ ಕರ್ತರಾರು
ಅಗಣಿತ ದೇವರುಗಳನಿಳೆಗೆ ತಂದವರಾರು
ಅಪರಿಮಿತ ವಿಷಯಗಳ ಜನಕರಾರು
ಯಾರು ....ಯಾರು.....ಅಗೋಚರರಾರು?
ಆಗಸವ ಅಳತೆ ಮಾಡುತ್ತ
ಆನಂದದಿ ಹಾರಾಡುವ ಹಕ್ಕಿಗೆ
ಯುಕ್ತಿ- ಶಕ್ತಿಯನಿತ್ತವರಾರು?
ಮುತ್ತಿನ ರಾಶಿ ಕದಡುತ;
ಹೊಂಬೆಳಕ ಚೆಲ್ಲುತ ಬರುವ
ಭಾನುವ- ಬಾನಲಿ ತಂದವರಾರು?
ಬಿರು ಬೇಸಗೆಯಲ್ಲು ,ಸತ್ವವಿಹೀನ
ವಾಗಿಹ ತರು ಲತೆಗಳು ತಂಪಾದ
ಚಾಮರವ ಬೀಸುತಿರಲು ನಿಸ್ವಾರ್ಥ
ಸೇವೆಗೆ ಸಮನಾವುದಿಹುದೀಜಗದಿ
ಮಾಂಸದ ಮುದ್ದೆಯಾಗಿ ಜನಿಸಿದನು
ಮುಲ್ಲೊಕಗಳ ಸಂಪರ್ಕಹೊಂದಿಹನು
ಕಲೆ,ತತ್ವ,ವಿಜ್ಞಾನಾದಿಗಳ ಕರ್ತನಿವನು
ಸಕಲವ ಸೃಷ್ಟಿಸುವ ಸೃಷ್ಟಿಕರ್ತನ ಸೃಷ್ಟಿಸುವನು
ಲೆಕ್ಕವಿಲ್ಲದಷ್ಟು ನಿಯಮಗಳ ಮಾಡಿಹನು
ಲೆಕ್ಕವಿಲ್ಲದಷ್ಟು ಶಾಸ್ತ್ರ-ಪುರಾಣಗಳ ರಚಿಸಿಹನು
ತನ್ನ ಸಾಹಸದಿ ಇತಿಹಾಸ ಸೃಷ್ಟಿಸಿಹನು
ಸೃಷ್ಟಿ ನಿಯಮಗಳ ತಲೆಕೆಳಗಾಗಿಸಿಹನಿಂದು
ಸಹಜತೆಗೆ ಸೆಡ್ಡೋಡೆದು ಬೆಳೆದಿಹುದೀಧರೆ
ಅಸಹಜವಾಗಿ ,ನಿಸರ್ಗವು ನಿಂದಿಹುದು
ಸಂಹಾರಕಾಗಿ,ಮಾನ ರಕ್ಷಣೆಗೆಂದು
ಮಾನ ರಕ್ಷಿಸಿದರೆ ಉಳಿಯುವುದು
ನಮ್ಮೆಲ್ಲರ ಪ್ರಾಣವಿಂದು
ಶಾರಧ
- ಶಕುಂತಲಾ
05 Dec 2017, 09:56 pm
Download App from Playstore: