ಪುಟ್ಟ ಮಲ್ಲಿಯ ನಿದ್ರೆ
ಅಪರೂಪಕ್ಕೆ ಜಾರಿರುವಳು ಸುಖ ನಿದ್ರೆಗೆ
ನನ್ನ ಪುಟ್ಟ ಮಲ್ಲಿ,
ನೋವನುಂಡ ಮುಗ್ದ ಮೊಗದಲ್ಲಿ
ಸುಂದರ ಮಂದಹಾಸವ ಚೆಲ್ಲಿ.
ಮಂತ್ರಮುಗ್ದನಾಗಿ ನಾನು
ಸವಿಯುತ್ತ ಕುಳಿತಿರುವೆನವಳ
ಬೆಳುದಿಂಗಳ ಹೋಲುವ ಸ್ನಿಗ್ದ ರೂಪವ..
ಹುಣ್ಣಿಮೆ ಚಂದ್ರನಂತೆ ಹೊಳೆವ ಮೊಗ
ಹಾಲ್ಗೆನೆಯ ಹಾಕಿ ತೊಳೆದ ಹೊಳಪ ಕೆನ್ನೆಯ.
ಶುಭ್ರ ಬಿಳಿಯ ಹಾಳೆಯಂತೆ ವಿನೀತ ಹಣೆ
ಹುಬ್ಬು ಬಾಗಿ ನಿಂತ ಭತ್ತದ ತೆನೆ.
ರೇಶಿಮೆಯ ರೆಪ್ಪೆ ಮುಚ್ಚಿರುವ ಕಂಗಳೊಳಗೆ
ಕಾಣುತಿರುವಳೇನೋ ಮನೋಹರ ಕನಸ,
ಚಂದ್ರ ಶಿಲೆಯ ತೇದು ತೇದು ಸುಂದರಗೊಳಿಸಿದ
ನವಿರು ನುಣುಪ ನಾಸಿಕ.
ಜೇನಿನಲ್ಲಿ ಅದ್ದಿ ಇಟ್ಟ
ಚೆಂಗುಲಾಬಿ ಎಸಳಿನಂತೆ,
ಮೃದು ಮಧುರ ತುಟಿಯ ದಳವು,
ಅದುರುತಿರುವ ಸಡಿಲ ಸುಮವು.
ಆಲೆಮನೆಯ ಉಂಡೆ ಬೆಲ್ಲ,
ಅಂದಗಾತಿಯ ತುಂಡು ಗಲ್ಲ.
ಬೇರೆ ಏನೂ ಹೊಗಳಲಾರೆ,
ಎದ್ದ ಮೇಲೆ ಹೊಡೆವಳಲ್ಲ...
- ಶ್ರೀಗೋ.
13 Dec 2017, 12:14 pm
Download App from Playstore: