ಬಾಲ್ಯ ವಿವಾಹ
ಪಾಠಿ ಪುಸ್ತಕ ಹಿಡಿದ ಬೆರಳಿನ್ನು
ಬರೆಯುವುದು ಕಲಿತಿಲ್ಲ ಸರಿಯಾಗಿ,
ಬಂಧನದ ಬಲಿ ಏತಕೆ ಬಡವಿಯಾದ
ಕಾರಣಕ್ಕೆ ಮದುವೆ ಎಂಬ
ಜೀವಿತಾವಧಿಯ ಸೆರೆಮನೆಯಲ್ಲಿ?
ಮೊಡವೆಯು ಮೂಡಿಲ್ಲ
ಮುಖದ ಅಂದವ ಹೆಚ್ಚಿಸಲಿಂದು
ಮೂಗುತಿ ಏಕೆ ಸಂಪ್ರದಾಯದ ಹೆಸರಿನಲ್ಲಿ ,
ಬೆಳ್ಳಿ ಕಾಲುಂಗುರದ ಬೆಲೆಯೂ ತಿಳಿದಿಲ್ಲ
ಕಟ್ಟಿ ಹಾಕುವಿರಿ ಏತಕೆ ಸವಿ ಬಾಲ್ಯವ
ಸಾಯಿಸಿ ಇಂದು?
ಗುರುತು ತಿಳಿಯದ ಸರಿ ಸುಮಾರು
ವಯಸ್ಕನ ಪರಿಚಯ ಏತಕೆ ನನಗೆ
ಅವನ ಕಟುವಾದ ಕಣ್ಣ ಕೆಳಗೆ
ಹೂವಿನಂತೆ ಬಾಡಿ ಹೋಗಲಿಂದು,
ವಿದ್ಯೆ ನನ್ನ ಹಕ್ಕು ಎಂದು ತಿಳಿಯದ ತಂದೆ - ತಾಯಿ
ಅವರು ಹೆತ್ತ ಕಾರಣಕ್ಕೆ ಕಟ್ಟಿ ಹಾಕಿ ಕಳಿಸುವರು
ಮೂರು ಗಂಟು ನೇಣಿನಂತೆ
ಊರ ಮಂದಿ ಎದುರಿಗೆ ಮೀಸೆ ತಿರುವಿ ಗರ್ವದಿ.
ಪರಿಚಯವೇ ಇಲ್ಲದ ಪಾಮರರಿಂದು
ತನ್ನ ಮನೆ ಆಳಿನಂತೆ ನೋಡುವರು,
ಅತ್ತೆ-ಮಾವಂದಿರರು ನಾದಿನಿ-ಮೈದುನರು,
ಹೆಜ್ಜೆ ಸದ್ದು ಆದಿತೆಂದರೆ ಬೈಯುವಳು ಅತ್ತೆವ್ವ
ಎಂತ ಬುದ್ದಿ ಕಲಿಸಿರುವಳು ನಿನ್ನ ಹೆತ್ತವಳೆಂದು,
ಎಲ್ಲಿ ಕಲಿಸಿದವಳು ಬುದ್ದಿ
ನನಗೆ ತಿಳುವಳಿಕೆ ಬರುವಷ್ಟರಲ್ಲೇ
ಹಣದ ಆಸೆ ತೋರಿ ಅವರಿಗೆ ಕೊಂಡುಕೊಂಡರಲ್ಲ
ನನ್ನ ವಯಸ್ಸಾದ ನಿಮ್ಮ ಮಗನಿಗೆ ವಧುವಾಗಿ.
ಇರುವಳೊಬ್ಬಳು ಸೊಸೆ
ಹಡೆದಿರುವಳು ಒಂದು ವಂಶೋದ್ದಾರಕನನ್ನ
ಎಂದು ಹೇಳಿಕೊಳ್ಳಲು ಹೆಮ್ಮೆಯಿಂದ
ತಮ್ಮ ಮಗನು ಗಂಡು ಎಂದು,
ನನ್ನ ದೇಹ ರಚನೆ ಪೂರ್ತಿಯಾಗುವ ಅಷ್ಟರಲ್ಲಿ
ದಾರುಣವಾಗಿ ನನ್ನ ಮೇಲೆ ಹಲ್ಲೆ ನಡೆಸಿ
ಚಿತ್ರವದೆಯ ಕೊಡುವಿರಾ?
ಆಡಿದರೆ ಮಾತೊಂದು
ಮತ್ತೆಲ್ಲಿ ತಮ್ಮ ಪಾಪ ಹೊರ ಬೀಳುವುದೆಂದು,
ನನ್ನ ಬಾಯಿಗೆ ಬೀಗ ಹಾಕಿ
ಹೆಣ್ಣು ಹೆಚ್ಚು ಮಾತನಾಡಬಾರದೆಂದು
ಸೆರಗಿನಿಂದ ನನ್ನ ಸರಪಳಿಯಲ್ಲಿ ಕಟ್ಟಿ ಹಾಕುವಿರಾ?
ಬಾಲ್ಯ ನನ್ನ ಸುಂದರ ಕನಸು,
ಹೆಣ್ಣೆಂದು ಮುರಿಯದಿರಿ ಅದನ್ನ
ಬಾಲ್ಯ ವಿವಾಹದ ಕಾರಣಕ್ಕೆ ಇಂದು,
ಅಂಗಲಾಚಿ ಬೇಡುತಿರುವೆ ನಿಮ್ಮನ್ನ
ನಾನಿಂದು ಅರಿತು ನಡೆಯಿರಿ
ನಾನು ಒಂದು ಉಸಿರಾಡುವ ಜೀವವೆಂದು......
- ಚುಕ್ಕಿ
19 Dec 2017, 12:06 pm
Download App from Playstore: