ಜೊತೆಗಾತಿ.
ಬಿಸಿಲು ಬೆಂಗಾಡಿನ ಬಸವಳಿದ
ನನ್ನ ಬಾಳ ಪಯಣದಲ್ಲಿ
ನೀನೇಕೆ ಜೊತೆಯಾದೆ ಒಲವೇ
ನಿನಗೆ ಬೇರೇನೂ ಕೆಲಸ ಇರಲಿಲ್ಲವೇ ?
ಕೆಸರಿನ ಸಮಾಜದಲ್ಲಿ ಮೊಳೆತು ಅರಳಿದ
ಕಂಪು ಸೂಸಿ ನಗೆಯ ಹರಡಿದ
ಕೆಂಪು ತಾವರೆಯು ನೀನು,
ದಿಕ್ಕು ದೆಸೆಯಿಲ್ಲದೆ ಬಂದು
ಬಾಂಧವ್ಯಗಳ ಕಿತ್ತೆಸೆದು,
ತಿಲಾಂಜಲಿಯಿತ್ತು ಹೊರಟಿದ್ದೆ ನಾನು
ಬಿಟ್ಟೆಲ್ಲ ಸಂಪ್ರದಾಯಗಳ
ಬೇಡವಾಗಿತ್ತು ಇನ್ನೆಂದೂ
ಈ ಹುಲು ಮಾನವರ ಸಹವಾಸ
ಹೇಳಿ ಬಿಟ್ಟಿದ್ದೆ ಎಲ್ಲಾ ಸಂಕೋಲೆಗಳಿಗೂ ವಿದಾಯ,
ಆದರೂ ಎಲ್ಲಿಂದ ಬಂದು ನೀನು ಆತುಕೊಂಡೆಯೋ ನಾನರಿಯೆ,
ಬಿಟ್ಟೆನೆಂದರೂ ಬಿಡದೀ ಮಾಯೆ
ಬಟ್ಟಲು ಕಂಗಳ ಮೋಹಕ ಛಾಯೆ
ನಿನ್ನ ಮೋಹದ ಸಂಕೋಲೇ ಕಳಚಿ ಮುಂದೆ ಓಡಲೇ?
ನಿನ್ನ ಕೈ ಹಿಡಿದು ನನ್ನೊಡನೆ ಎಳೆದು ಸಾಗಲೇ ?
ಅರಿತೇನೆಂದರೂ ಅರಿಯಲಾರೆನು ಹೆಣ್ಣೇ
ನಮ್ಮ ಈ ಸಲುಗೆಯ ಕೊನೆಯನ್ನು.
ಮರೆತೇನೆಂದರೂ ಮರೆಯಲಾರೆ ಹೆಣ್ಣೇ
ನಿನ್ನ ಈ ಮಮತೆಯ ಸವಿಯನ್ನು.
- ಶ್ರೀಗೋ.
28 Dec 2017, 10:52 pm
Download App from Playstore: