ಎಂಥ ಕಾಲ ಬಂತೋ ತಮ್ಮ
ಎಂಥ ಕಾಲ ಬಂತೋ ತಮ್ಮ
ಈ ಲೋಕವೆಲ್ಲ ಕೆಟ್ ಹೋಯ್ತೋ ತಮ್ಮ
ಈ ಮನುಷ ಪ್ರಾಣಿಗಿಂತ ಕಡೆಯಾದ್ನಲ್ಲೋ ತಮ್ಮ
ಈ ಮನ್ಷನ್ ಜನ್ಮಕಿಷ್ಟು ಬೆಂಕಿ ಹಾಕ್ಲೋ ತಮ್ಮ "ಪ"
ದಿನಕ್ಕೊಂದು ವೇಷ ಹಾಕ್ತಾನೆ
ಕ್ಷಣಕ್ಕೊಂದು ಮಾತನಾಡ್ತಾನೆ.
ಪ್ರೀತಿ ಸ್ನೇಹಕ್ಕೆ ಇವ್ನು ಸೊಪ್ಪ್ ಹಾಕೊಲ್ಲ
ದ್ವೇಷ ಮೋಸ ಮಾಡದೆ ನಿದ್ದೆ ಮಾಡೋಲ್ಲ.
ಆಸ್ತಿಗಾಗಿ ಹೆತ್ತವರನ್ನೇ ಕೊಲೆ ಮಾಡ್ತಾನೆ
ನೋಟಿಗಾಗಿ ನಂಬಿದವರ ಕತ್ತು ಕುಯ್ತಾನೆ.
ಗಂಟಿನ ಆಸೆಗಾಗಿ ಗೋಮುಖವ್ಯಾಘ್ರನಾಗ್ತಾನೆ
ಒಂಟಿ ಹೆಣ್ಣು ಕಂಡರೆ ವಿಕೃತ ಕಾಮುಕನಾಗ್ತಾನೆ.
ಇಲ್ಲಿ ದೀನರಿಗಿಲ್ಲ ಉಳಿಗಾಲ
ಇದು ಹೀನರಿಗೆಲ್ಲಾ ಪರ್ವಕಾಲ " 1 "
ಪಾಪ ಮಾಡಿ ದೇವರ ಹುಂಡಿಗೆ ಹಣ ಹಾಕ್ತಾನೆ
ಪುರಾಣ ಹೇಳಿ ಜನರ ಜೇಬಿಗೆ ಕನ್ನ ಹಾಕ್ತಾನೆ.
ಓಟಿಗಾಗಿ ಕಾಲು ಹಿಡಿತಾನೆ
ಸೀಟಿಗಾಗಿ ತಲೆ ತೆಗಿತಾನೆ.
ಜಾತಿ ಜಾತಿ ಅಂತ ವಿಷದ ಗೋಡೆ ಕಟ್ತಾನೆ
ಧರ್ಮ ಧರ್ಮ ಅಂತ ದ್ವೇಷದ ಬೀಜ ಬಿತ್ತುತ್ತಾನೆ.
ಹಾಡುಹಗಲೇ ಕೊಲೆ ಸುಲಿಗೆ ದರೋಡೆ ನಡೆಯುತಿದೆ
ಸುತ್ತಮುತ್ತಲೇ ದ್ವೇಷ ಮೋಸ ಸ್ವಾರ್ಥ ಮೆರೆಯುತಿದೆ.
ಇದು ಲಂಚಕೋರರ ಪರಪಂಚ
ಇಲ್ಲಿ ನೀಚರೇ ಪರಮೋಚ್ಛ. " 2 "
- ಸುರೇಶ್ ಟಿ ವಿ
30 Jan 2018, 05:21 pm
Download App from Playstore: