ಹುಟ್ಟು ಹಬ್ಬದ ಹರಕೆ

ಹುಟ್ಟು ಹಬ್ಬದ ಹರಕೆ
ಆತ್ಮ ಬಂಧುವೆ ನಿನಗೆ
ಕೊಟ್ಟು ಹರಸುವೆನು ಮುತ್ತ
ಪ್ರೀತಿಯಲಿ ನೆತ್ತಿ ತುದಿಯಲಿ ಇವತ್ತ.

ಜೀವನದಲಿ ನೂರು ನೋವುಗಳಿದ್ದರೇನು
ಎಲ್ಲವನು ಬದಿಗಿರಿಸಿ ನಡೆ ಮುಂದೆ ನೀನು
ಜೇನ್ನೊಣಗಳ ಅಂಬು ಚುಚ್ಚಿ ಕೊಟ್ಟರೂ ನೋವು
ಕಷ್ಟ ಪಟ್ಟರೇನೇ ಸಿಗುವುದು ಸಿಹಿಯಾದ ಜೇನು.

ಸಿರಿ ಇಲ್ಲದಿದ್ದರೇನಂತೆ ಮನೆಯಲ್ಲಿ
ಸೆರೆಯಾಗದಿದ್ದರಷ್ಟೇ ಸಾಕಲ್ಲವೇ..
ಅದರೂನೂ ಪಾಪದ ಕುಸುಮಗಳಿಗೆ
ಮನೆಯೇ ಮಮತೆಯಿಲ್ಲದ ನರಕವಂತೆ.

ಕೆಸರಿನಲೆ ಹುಟ್ಟುವುದು
ನಗು ಮೊಗದ ಹಿರಿ ಕಮಲ,
ನೋವುಗಳನು ಮೆಟ್ಟುವುದು
ನಗು ಮೊಗದಲಿ ಇರಲಿ ಛಲ.

ಮುಳ್ಳಾಗು ಮನವ ಕುಕ್ಕುವ
ಮೃಗ ಪಕ್ಷಿ ಜಂತುಗಳಿಗೆ,
ಮುಳ್ಳಲ್ಲೇ ಅರಳಿ ಕಂಪು ಬೀರುವ
ಜಾಜಿ ಮಲ್ಲಿಗೆಯಾಗು
ನಿನ್ನಾತ್ಮಾಭಿಮಾನಕೆ ಗೌರವ ಕೊಡುವ
ಸಜ್ಜನ ಸ್ನೇಹಿ ಹಿತೈಷಿಗಳಿಗೆ.

ಸದಾ ನಿನ್ನೊಂದಿಗಿರಲಿ ಹುಡುಗಿ
ಎಡಗೈಲಿ ಖಡ್ಗ, ಬಲಗೈಲಿ ಲೇಖನಿ,
ಆತ್ಮ ರಕ್ಷಣೆಗೆ ಒಂದು,
ಆತ್ಮ ನಿವೇದನೆಗೆ ಮತ್ತೊಂದು..
ತುಟಿಯಲ್ಲಿ ಹಂಚುತ್ತಿರು ಮಂದಹಾಸವ
ಮರೆಯದೆಲೆ ನೀನು ಮುಂದೆ ಎಂದೆಂದೂ..

ನಿನ್ನ ಬಾಳ ಕತ್ತಲ ದಾರಿಯಲ್ಲಿ
ನಾನೆಂದಿಗೂ ಬರುವೆ ಕಿರು ದೊಂದಿಯಾಗಿ
ನೀನಿಡುವ ಪ್ರತಿ ಹೆಜ್ಜೆಗಳ ಕೆಳಗೆ ಕೈಯಿಟ್ಟು
ಕಾಪಾಡುವೆ ನಿನ್ನ ಮೃದು ಪಾದ ಮನಸುಗಳ
ದುರ್ಗಮ ದಾರಿಯ ಕಲ್ಮುಳ್ಳು ಚುಚ್ಚದಿರಲೆಂದು.

ಅನುದಿನವೂ ಉಣಿಸಿದೆ ನೀನೆನಗೆ,
ಪ್ರೀತಿ ವಾತ್ಸಲ್ಯದ ಅಮೃತ ಸುಧೆ,
ಅವ್ವ ಕೊಟ್ಟಂತೆ ರುಚಿಯ ಕೈತುತ್ತು
ಆತ್ಮೀಯ ಗೆಳತಿಯ ಸಿಹಿ ಹೊತ್ತು
ನಿನ್ನ ನಗುವಲ್ಲೇ ಕಳೆದು ಹೋದೆ
ನಾನು ಮೂರು ಹೊತ್ತು.

ತೊರೆಯಲೆಂತು ಹೆಣ್ಣೇ ನಿನ್ನೊಲವಿನ ಒಡನಾಟ
ಆಡಿ ನಲಿದೆವಲ್ಲೇ ಹುಡುಗಿ ಮೈ ಮರೆತು ಮಂಗನಾಟ
ಸಾಗುತಿರಲಿ ಹೀಗೆಯೇ ನಮ್ಮ ಪ್ರೀತಿಯ ಕೂಟ
ನೋವುಗಳ ಮರೆಸಿ ಕಿರುನಗೆಯ ಮೂಡಿಸುವ
ಚೆಲುವಿನಾಟ.

- ಶ್ರೀಗೋ.

12 Feb 2018, 12:13 am

---

Download App from Playstore: