ಬಿಸಿ ಬಿಸಿ ಸುದ್ದಿ
ಕೇಳಬನ್ನಿ ಕೇಳಬನ್ನಿ
ಒಯ್ದಿಹೆನು ಬಿಸಿ ಬಿಸಿ ಸುದ್ದಿ
ಹೇಳಬಾರೆ ಹೇಳಬಾರೆ
ಏನ ಸುದ್ದಿ ತಂದಿಹೆ ಸುಬ್ಬಿ
ಊರೂರು ಅಲೆದಿಹರು
ಕೇರಿಗಳಲಿ ಉರುಳಿಹರು
ಬಡವ-ಬಲ್ಲಿದ,ಮೇಲು-ಕೀಳು
ಅರಿವಿಲ್ಲದೆ ಬೇಡುತಿಹರು
ಯಾರ್ಯಾರು ಅಲೆದಿಹರು
ಎಲ್ಲೆಲ್ಲಿ ಉರುಳಿಹರು
ಏನನ್ನ ಬೇಡಿಹರು
ತಿಳಿಸಿ ಹೇಳೆಲೆ ಸುಬ್ಬಿ
ಐದುವರುಷಗಳ ಕಾಲ
ಅಧಿಕಾರ ಹಿಡಿದು ಕೂರುವರು
ಮದಗಜಗಳಂತೆ ಮೆರೆಯುವರು
ಮರಳಿ ನಮ್ಮಕಾಲಿಗೆರಗುವರು
ಪದವಿ ಬಂದಾಗ
ಪರಮಾತ್ಮನನ್ನೆ ಮರೆಯುವರು
ಪದವಿಗಾಗಿ ಪರಮಾತ್ಮನಿಗೆ
ಆಮಿಷಗಳ ಸುರಿಮಳೆ ಸುರಿಸುವರು
ರಣರಂಗದಲಿ ರಣಕಹಳೆ ಊದಿ
ಹೊರಾಡುವರು ವೈರಿಯ ಶಯನಕಾಗಿ
ಸ್ಥಾನಮಾನ ನೀಡುವೆನೆಂದರೆ
ಒಂದೆಲೆಯಲಿ ಉಣ್ಣುವರು ಒಂದಾಗಿ
ಹಗೆಯ ಮರೆವರು ಅರಗಳಿಗೆಯಲಿ
ತಾನೊಂದು ಹತ್ತಿಹಣ್ಣೆಂಬುದ
ಮರೆತ ಮೂರ್ಖರು
ಬೇರೊಂದು ಹಣ್ಣೊಳಗಿನ
ಉಳುಕ ಹುಡುಕುತಿಹರು
ತರತರದ ಬಣ್ಣವ ಹಚ್ಚಿ
ತರತರಹದ ನಟನೆಗಳ ಮಾಡುತಿಹ
ಸೀಟಿಗಾಗಿ ಶೀಲವ ತ್ಯಜಿಸುತಿಹ
ನಾಯಕರುಗಳ ಸುದ್ದಿ ಕೇಳಬನ್ನಿ
ಶಾರಧ
- ಶಕುಂತಲಾ
28 Apr 2018, 03:39 pm
Download App from Playstore: