ಸಮಾಜ...
ಯಾವ ಕೆಟ್ಟ ಚಟದ ಅಮಲೊ
ಮೋರಿಯಂಚಿನಲ್ಲಿ ಪ್ರಜ್ಞೆ ತಪ್ಪಿ ಬಿದ್ದಿದೆ ಸಮಾಜ
ಕೊಚ್ಚೆಯೊಳಗೆ ಜಾರಿ ಬಿದ್ದು ನಾರುವುದೊಂದು ಬಾಕಿ
ಮೋರಿ ಸೇರಿ ಮಿಂದೆದ್ದು ಅದರ ವಾಸನೆಯ
ನಡೆದಲ್ಲೆಲ್ಲ ಹರಡಿ ಸೋಂಕು ತಗುಲಿ ನರಳಿಸಿ
ಕಾಲಿಟ್ಟಲೆಲ್ಲ ಅಮಲೇರಿಸಿ ಸಾಗುವಾಸೆಯ ಧ್ಯೇಯವಿರಬೇಕು ಅದಕೆ
ಯಾರು ಎಬ್ಬಿಸುವವರಿಲ್ಲ ಒಂದಿಷ್ಟು ನೀರು ಸುರಿದು.
ಬಡಿದು ಚಿಕಿತ್ಸೆ ಕೊಡಿಸಿ, ಹಿಡಿದ ಅಮಲ ಬಿಡಿಸಿ
ಅದರ ಸ್ವಾಸ್ಥ್ಯ ಕಾಪಾಡುವ ಮನಸು ಯಾರಿಗೂ ಇದ್ದಂತಿಲ್ಲ
ಎಲ್ಲ ಅದರತ್ತ ತಿರುಗಿ ತಿರುಗಿ ನೋಡಿ ನಗುವವರೆ
ಮೂಗು ಮುಚ್ಚಿಕೊಂಡು ಏನು ನಡಿದಿಲ್ಲವೆಂಬಂತೆ ನಡೆವವರೆ
ಬಿದ್ದು ಹೊರಳಾಡುತ್ತಿರುವದ ನೋಡಿ ಜರಿದು ಸಾಗುವವರಷ್ಟೆ
- ಶ್ರೀಕಾವ್ಯ
14 Jun 2018, 06:35 pm
Download App from Playstore: