ಯಾವುದೀ ಮೌನ
ಯಾವುದೀ ಎದೆಯ ಸೇರಿದ ಮೌನ
ಎಲ್ಲಿಹುದು ಇದರ ಅಡಗು ತಾಣ
ಎತ್ತ ಸಾಗಿಹುದು ಇದರ ಯಾನ
ಮಾತಿರದೆ ಬಸವಳಿದಿದೆ ಮೂಕ ಮನ
ಎನ್ನೀ ಮನವ ಏತಕೆ ಹೊಕ್ಕಿತೊ
ಎಲ್ಲಿಂದ ತೂರಿ ಬಂದು ಸೇರಿತೊ
ಯಾರ ಪರ ಅಹವಾಲು ತಂದಿತೊ
ಎಡಬಿಡದೆ ಕಾಡಲೆಂದೆ ಬಂದೀತೊ
ಏನದರ ನನ್ನೆ ಗೆದ್ದೆನೆಂಬ ಆಟ
ನೆನಪುಗಳ ಕಾರುಬಾರೇನೆ ರಸದೂಟ
ಕಿಂಚಿತ್ತು ಕರುಣೆಯಿರದ ಇರಿಯೊ ನೋಟ
ಎಲ್ಲಿ ತಿಳಿವುದದಕೆ ಎನ್ನೊಳಗಿನ ತೊಳಲಾಟ
ಮೌನವಿದು ಮಿತಿಯೊಳಗೆ ಸಿಗದಷ್ಟು ವಿಸ್ತಾರ
ನಿತ್ಯ ನೂರಾರು ಸಂಚಿಕೆಗಳ ಪ್ರಸಾರ
ಮಾತಾಗದ ಭಾವವೆಲ್ಲ ಎನ್ನೊಳಗೆ ಅಪಾರ
ಒಮ್ಮೆ ಬಿಡುವುಕೊಟ್ಟರೂ ಇಳಿಸಿಬಿಡುವೆ ಎದೆಯ ಭಾರ
- ಶ್ರೀಕಾವ್ಯ
30 Jun 2018, 05:45 pm
Download App from Playstore: