ನಾನು ಹಾಲುಗಲ್ಲದ ಕೂಸು
ನಾನು ಹಾಲುಗಲ್ಲದ ಕೂಸು
ಭೂಮಿ ಗಗನದಷ್ಟು ಕನಸು
ಏನು ಅರಿಯದ ಮುಗ್ಧ ಮನಸು
ಚಿಟ್ಟೆಗಳ ಜೊತೆ ಸೇರಿ ಹಾರಿ
ಇಳಿಜಾರ ಕಾಮನಬಿಲ್ಲ ಏರಿ
ನಲಿಬೇಕು ಅತ್ತಿಂದಿತ್ತ ಜಾರಿ
ನಾನಾದರು ಪುಟ್ಟ ಪೋರಿ
ಕೂಡಾಕುವರು ಹೆತ್ತವರು ಹೆದರಿ
ನನ್ನ ಮಾಡುವರೆಂದು ಚೋರಿ
ಕಾಮುಕರ ಕಣ್ಣ ನೋಟ
ಕೊಡುವುದೇನು ನನಗೆ ಕಾಟ?
ನೋಡಿ ಹೇಳಿ ನೀವೆ ನನ್ನ ಮೈಯ ಮಾಟ
ಮುಗ್ಧ ಮುಖದ ಎಳೆಯಳು ನಾನು
ಪುಟ್ಟ ಕೈಕಾಲು, ನಗುವು ಸವಿಜೇನು
ನನ್ನ ನೋಡಿದರೂ ಕೆಟ್ಟದೃಷ್ಟಿಯುಟ್ಟುವುದೇನು?
ಸ್ವಲ್ಪವೂ ಕನಿಕರವಿಲ್ಲವೆ ದೇವರಿಗೆ?
ಕಿತ್ತುಕೊಳ್ಳುತ್ತಿರುವ ಬಾಲ್ಯದ ಮುಗ್ಧ ನಗೆ
ಬುದ್ಧಿ ಹೇಳದೆ ಆಡಲುಬಿಡೆಂದು ಹೆತ್ತವರಿಗೆ
ಅವರಿಗೆ ನನ್ನ ಬದುಕೆ ಮುಖ್ಯವಲ್ಲವೇ?
ಅದಕ್ಕೆಂದೆ ನನ್ನ ಕೂಡಿಡುವರಲ್ಲವೇ?
ನನಗೇನಾದರು ಆದರವರಿಗೆ ಗತಿ ಸಾವೆ?
ನಾನೇನು ಮಾಡಲಿ ಈಗ
ಯಾರಿಗೇಳಲಿ ನೋವಿನ ಆವೇಗ
ಜಡಿದು ಕೂರಲೇನು ಕಾಲಿಗೆ ಬೀಗ
ಹತ್ತಿರ ಯಾರು ಬಂದರು ಹೆದರಿಕೆ
ಮೈಮುಟ್ಟಿದರೆಂದರೆ ಎಲ್ಲಿಲ್ಲದ ಅಂಜಿಕೆ
ಎಳೆಯ ಮನದೊಳಗೆ ಈ ಭಾವ ಹುಟ್ಟಬೇಕೆ?
ಎಲ್ಲರೊಡಗೂಡಿ ಜಗವ ಕಾಣುವಾಸೆ
ಉಳಿಸಿ ಸಾಯುವ ಮುನ್ನ ಕನಸು ಮನಸೇ
ಇಲ್ಲದಿರೆ ನಾನೆಂದೂ ನಿಮ್ಮ ಕ್ಷಮಿಸೆ
ನಾನು ಹಾಲುಗಲ್ಲದ ಕೂಸು
ಭೂಮಿ ಗಗನದಷ್ಟು ಕನಸು
ಏನು ಅರಿಯದ ಮುಗ್ಧ ಮನಸು
- ಶ್ರೀಕಾವ್ಯ
04 Jul 2018, 06:05 pm
Download App from Playstore: