ಗುರು ಚರಣದಲಿ
ಗುರು ನಿನ್ನ ಚರಣಕೆ ಶಿರಬಾಗಿ ನಮಿಸುವೆನು
ಕನಿಕರಿಸಿ ಹರಸೆನ್ನನು
ಮನದ ಕತ್ತಲೆ ಕಳೆದು ಜ್ಞಾನ ದೀಪ್ತಿಯ ಬೆಳಗಿ
ಅರಿವಿನ ಸಿರಿದೀಪವಾಗಿ ಉರಿಸೆನ್ನನು
ನನ್ನ ಅರಿವಿನ ಹೊಳೆಯು
ಉಕ್ಕಿ ಹರಿಯಲಿ ನಿನ್ನ ಕರುಣೆಯಿಂದ
ನನ್ನ ಮನಸಿನ ಕೊಳೆಯು
ತೊಳೆದು ಹೋಗಲಿ ನಿನ್ನ ಒಲುಮೆಯಿಂದ
ನಾ ದೀಪವಾಗಲೆಂಬ ನನ್ನ ಒಡಲಾಸೆ ನಡೆಸು
ನಿನ್ನ ಅರಿವಿನ ಜ್ಯೋತಿಯಿಂದ ದೀಪ ಉರಿಸು
ಜ್ಞಾನದರಿವನು ಹರಿಸು ಕಳೆದು ಹೋಗಲಿ ತಮಸು
ಸುಜ್ಞಾನದೆಡೆಗೆನ್ನ ಸತತ ನಡೆಸು
ನಿನ್ನ ಕರುಣೆಯ ಬೆಳಕಿನಲಿ ನನ್ನಂತರಂಗದ ಚಕ್ಷು
ತೆರೆಸಿ ನೀಡೆನಗೆ ಅರಿವಿನ ಭಿಕ್ಷೆ
ಪರಮ ಜ್ಞಾನಿಯು ನೀನು ಅಜ್ಞಾನಿಯು ನಾನು
ನೀಡೆನಗೆ ಅಪಾರ ಜ್ಞಾನದ ದೀಕ್ಷೆ
ಅಂತರಂಗದ ತೆರೆದು ಬೇಡುತಿರುವೆನು ಗುರುವೇ
ಮನದ ಕಾರಿರುಳ ಬಲು ದೂರ ಸರಿಸು
ನನ್ನದೆಯ ಗುಡಿಯಲ್ಲಿ ನಂದಾದೀಪವ ಉರಿಸು
ಆ ದೀಪದ ಕುಡಿಯೆ ನಾನಾಗಲೆಂದು ಹರಸು
- Prakash Angadi
06 Jul 2018, 09:05 am
Download App from Playstore: