ಉದುರಿರುವ ಒಂಟಿ ಎಲೆ
ಒಂಟಿ ಒಣ ಎಲೆಯೊಂದು ಉದುರಿಹುದು
ಜನರಿಲ್ಲದಾ ಉದ್ಯಾನದ ಕಲ್ಲು ಬೆಂಚಿನ ಮೇಲೆ..
ಮಟಮಟ ಮದ್ಯಾಹ್ನ ಉರಿಬಿಸಿಲು ಸುಡುತಿಹುದು
ಕಲ್ಲು ಕಾದು ಬಿಸಿ ಹೆಂಚಾಗಿಹುದು..
ಆದರೂ ಉರಿಯಿಲ್ಲ ಎಲೆಗೆ
ಏಕೆಂದರೆ ಉಸಿರಿಲ್ಲ ಅದಕೆ..
ಮರದ ನಂಟು ಇರುವ ವರೆಗೂ
ಹಸಿರೆಲೆ ಎಂಬ ಸನ್ಮಾನ
ಹಕ್ಕಿ ಪಿಕ್ಕಿಗಳಿಗೆ ತಂಪೆರೆದು ಸಾಂತ್ವನ,
ಹೂ ಹಣ್ಣುಗಳ ಬಚ್ಚಿಟ್ಟು ಕಾಯ್ದು
ಅಭಿಮಾನ,
ಇದೇ ಕಲ್ಲು ಬೆಂಚಿನ ಮೇಲೆ ಕುಳಿತು
ಪ್ರೇಮ ಸಲ್ಲಾಪವಾಡಿದ ಜೋಡಿಗೆ
ನೆರಳಿತ್ತು ಸಲಹಿದ ಸಿಹಿ ಸಿಂಚನ.
ಪಟ್ಟನೆ ಬಿದ್ದು ಅಲುಗಿಸಿ ಎಳೆಯ
ಮಳೆ ಹನಿಗಳು ಎಂದೋ ಜಾರಿ
ಹೋದವು ಭೇಟಿಯಾದ ಅರೆಕ್ಷಣದ
ಎಲೆಯನು ಮರೆತು..
ಕೊಂಚವಷ್ಟೇ ನೆನೆಸಿ..
ರಾತ್ರಿಯೆಲ್ಲಾ ಹನಿದು ಮಡುಗಟ್ಟಿ
ಹನಿಯಾದ ಇಬ್ಬನಿ
ಸೂರ್ಯನ ಬರುವಿಕೆಗೆ ಹೆದರಿ
ಮೆಲ್ಲಗೆ ಜಾರಿಕೊಂಡಿದ್ದವು ತಣ್ಣಗೆ ಸವರಿ..
ಹಾಗೋ ಹೀಗೂ ಕಳೆದೇ ಹೋಯ್ತು
ಒಂದು ವರ್ಷ..
ವಸಂತದಲ್ಲಿ ಹುಟ್ಟಿದ ಎಲೆಗೆ
ವಸಂತ ಬರುವ ಮೊದಲೇ ಸಾವು!
ಆದರೂ ಕಂಡಿಲ್ಲ ಎಲೆ ಏನೂ ನೋವು.
ದಿಟ್ಟಿಸಿ ನೋಡಿದರೆ ಬೋಳಾಗಿ ಕಾಣುತ್ತಿದೆ
ತನ್ನ ಹೆತ್ತು ಹೊತ್ತ ಗಟ್ಟಿ ಮರ..
ಹಳೆಯ ಎಲೆಗಳನ್ನೆಲ್ಲ ಕೊಡವಿ
ಮತ್ತೊಮ್ಮೆ ಮೈತುಂಬಿಕೊಂಡು
ತನ್ನ ಇನಿಯ ವಸಂತನ ಬರಮಾಡಿಕೊಳ್ಳಲು..
- ಶ್ರೀಗೋ.
30 Sep 2018, 08:12 pm
Download App from Playstore: