ಯುದ್ಧದ ಹಾದಿ
ಯಾರ ಮಹಲನು ಕಟ್ಟುತ್ತಾ ಕಟ್ಟುತ್ತಾ
ಕುಸಿ ಕುಸಿದು ಕಡಿದು ಬೀಳುವುದು
ಯಾರಿಗೋ ತುಂಬಿ ಕೊಡಲು
ಒಂದೊಂದನೇ ಜೋಡಿಸುತ್ತಾ ಜೋಡಿಸುತ್ತಾ
ಒಡೆದೊಡೆದು ಚೂರಾಗಿ ಚದುರಿಹೋಗುವುದು
ಯಾರ ಗೋಪುರಕೋ
ಮಣ್ಣು ಹೊರುತ್ತಾ ಹೊರುತ್ತಾ
ಮಣ್ಣಲ್ಲಿ ಮಣ್ಣಾಗುವುದು
ಯಾರ ಕೊಳೆ ತೊಳೆಯುತ್ತಾ ತೊಳೆಯುತ್ತಾ
ಮಲಿನವಾಗಿ ನಾರುವುದು
ಇದೆಲ್ಲ ಕಂಡಾಗೆಲ್ಲ
ನಗು
ಅಥವಾ ಅಸಹನೆ
ಅಥವಾ ಹೇಸಿಗೆ ನಿನಗೆ
ಉತ್ಸವ
ಪೂಜೆ
ಮೆರವಣಿಗೆ
ಮತ್ತು
ಒಳಗೊಳಗೇ ಬೇಯುವುದು
ಯಾವುದು ದಿಟವೋ ಯಾವುದು ಸಟೆಯೋ
ಅವಳಾದರೋ ನಿನ್ನ ಒಂದು ಸಿಟ್ಟಿಗೆ
ಶಿರ ಕಡಿಯಲ್ಪಡುವ ದೇವರು
ಹತ್ತಿಗೆ ಹತ್ತಿದ ಬೆಂಕಿ
ಹಬ್ಬಿದ್ದೇ ತಿಳಿಯುವುದಿಲ್ಲ
ನಿನ್ನ ಬುಡ ಸುಡತೊಡಗಿದ ಮೇಲೆ
ಅದೆಲ್ಲವೂ ನಿನಗೂ ತಿಳಿಯದೇ ಇರುವುದೂ ಇಲ್ಲ
ಎನ್ನುವುದು ಪ್ರತಿಕಾರದ ಹಾದಿ
ಪ್ರೀತಿಯ ಪೀಯೂಷದ ರುಚಿ ನೆಕ್ಕಿ
ಮತ್ತಳಾದ ಯಾವ ಒಬ್ಬಳೂ
ಈ ಹಾದಿಯಾಗಿ
ಎಂದೂ ಪಯಣಿಸುವುದಿಲ್ಲ
ನಿನಗೆ ಗೊತ್ತಿರಲಿಕ್ಕಿಲ್ಲ
ಗಾಯಗೊಂಡಷ್ಟೂ ನಗುತ್ತ ಎದೆಯೊಡ್ಡುವ
ರಣಕಣದ ಹುಚ್ಚುಹಿಡಿದ ಯೋಧನಂತೆ
ಅವಳೊಬ್ಬಳು ಭಂಡಳು
ಈಗ ಗೊತ್ತಾಯಿತಲ್ಲವೇ
ಸರಿ ನೀನೀಗ ಹೊರಡು
ಸೋಲು ಗೆಲುವು
ಮೊದಲೇ ನಿರ್ಣಯವಾದ ಯುದ್ಧಕೆ
ಹೊರಡು ನೀನು
ನಿನ್ನ ಖಡ್ಗದ ನಾಲಗೆಗೆ
ನಂಜು ಲೇಪಿಸಿಕೊಂಡು
- ಕಾದಂಬಿನಿ
- ಕಾದಂಬಿನಿ
02 Oct 2018, 04:26 pm
Download App from Playstore: