ಅದೃಷ್ಟ ಚೆನ್ನಾಗಿರುವ ಕಾಲದಲ್ಲಿ

ಅದೃಷ್ಟ ಚೆನ್ನಾಗಿರುವ ಕಾಲದಲ್ಲಿ
ಕಾಗದದಲ್ಲಿ
ಕಲ್ಲೊಂದನ್ನು ಸುತ್ತಿಕೊಟ್ಟರೂ
ಅದಕ್ಕೂ ಮಹತ್ವ ಒದಗಿ ಬರುವುದು

ಹೆಣದ ಮೇಲಿನ ಹೂ
ವಿಚಿತ್ರವಾಗಿ ನಕ್ಕಿತು
ಕಾರಣ ಹುಡುಕುವುದು ನನ್ನ ಹಳೆಯ ಚಾಳಿ
ಅಂತೂ ಅದು ಗುಟ್ಟು ಬಿಟ್ಟಿತು-
'ಅವನು ಬದುಕಿದ್ದಾಗ
ದೂರ ಸರಿದುಹೋದ ಆ ಪ್ರತಿಯೊಬ್ಬನೂ
ಅವನ ಶವಯಾತ್ರೆಯ
ಈ ಚರಮಗೀತೆಯಲ್ಲಿ ದನಿಗೂಡಿಸುವುದನ್ನು
ನೀನೊಮ್ಮೆ ಗಮನವಿಟ್ಟು ನೋಡು
ಇದು ನಿನ್ನ ಮರಣದಲ್ಲೂ ಜರುಗುವುದು!'

ರಾತ್ರಿ ಪೂರ ಬಾರದ ನಿದ್ದೆ
ಮುಂಜಾವದಲಿ ಕಣ್ಣ ತಬ್ಬುವಾಗ
ಅದೆಷ್ಟೇ ಇಂಪಾದ
ಅಲಾರಂ ಸಂಗೀತವಾದರೂ ಕ್ರೂರ!

ಮೀನಿನವನು ಮೀನುಗಳನ್ನು
ತಕ್ಕಡಿಯಲ್ಲಿ ತೂಗತೊಡಗಿದಾಗಿನಿಂದಲೂ
ಯೋಚಿಸುತ್ತಲೇ ಇದ್ದೇನೆ
ಈ ಮೀನುಗಳ ಸಾವಿನಲ್ಲಿ
ನನ್ನ ಪಾತ್ರವೆಷ್ಟೆಂದು

ದೂರ ಸರಿದವರು
ಮತ್ತೆ ಬರುವರೆಂಬ ಭರವಸೆಯನೇ
ಬದುಕಿಬಿಡುವುದನು
ಅಮರ ಪ್ರೇಮವೆಂದಿತು ಲೋಕ
ಮತ್ತೆ ಯೋಚಿಸುತ್ತೇನೆ...
ಅಮರ ಪ್ರೇಮಕೆ ಹೇತುವಾದ ಆ ದ್ರೋಹಕ್ಕೆ
ಯಾವ ಉಡುಗೊರೆಯ ಕೊಡುವುದೆಂದು!

ನನ್ನನು ತೊರೆದುಹೋದವರು
ನನ್ನ ಮರಣದ ಚರಮಗೀತೆಯಲ್ಲಿ
ದನಿಗೂಡಿಸುತ್ತಾರೆಂದು ಕೇಳಿ
ಖುಷಿಯಾಯಿತು
ನಾನದನು ನೋಡಲು ಸಾಧ್ಯವಾಗಿದ್ದಿದ್ದರೆ
ಇನ್ನಷ್ಟು ಹೆಚ್ಚು ಖುಷಿಯಾಗುತ್ತಿತ್ತು
- ಕಾದಂಬಿನಿ

- ಕಾದಂಬಿನಿ

04 Oct 2018, 09:25 am

---

Download App from Playstore: