ಜಗಳಗಂಟಿ ಮರ
ಅದೊಂದು ಮರ
ಹೆಸರು ಜಗಳಗಂಟಿಮರ
ಶಾಂತವಾಗಿ ನಿಂತಿತ್ತು
ನನ್ನ ಮನೆ ಬಳಿಯಲ್ಲೇ
ನಾನು ಹುಟ್ಟಿದಾಗ
ನನ್ನ ಆ ಮನೆ ಜಗಳದ ಮನೆಯಾಗಿ
ಹೊಸಲು ದಾಟಿದಾಗ
ನನ್ನ ಕೇರಿ ಜಗಳದ ಕೇರಿಯಾಗಿ
ಬೆಳೆಯುತ್ತ ಬೆಳೆಯುತ್ತ
ನನ್ನ ಗೆಳೆಯರು ಜಗಳಗಂಟರಾಗಿ
ನನ್ನ ಊರೇ ಜಗಳದ ಊರಾಗಿ
ಪಾದ ಬೆಳೆಸುತ್ತ ಹೋದಂತೆಲ್ಲ
ನನ್ನ ರಾಜ್ಯವೂ ಜಗಳದ ರಾಜ್ಯವಾಗಿ
ಈಗ ನೋಡುತ್ತೇನೆ
ನನ್ನ ಇಡೀ ದೇಶಕ್ಕೆ ದೇಶವೇ
ಜಗಳದ ದೇಶವಾಗಿ
ಹೊತ್ತಿ ಉರಿಯುತ್ತಲಿದೆ!
ಹೇಗೆ ಹೇಳಲಿ
ಈ ಜಗಳಗಳ ಈ ಉದ್ದಕೂ
ಆ ಜಗಳಗಂಟಿ ಮರ
ಮತ್ತದರ ಶಾಂತಿ
ನನ್ನನು ಅದೆಷ್ಟು ಕದಡಿಹಾಕಿದೆಯೆಂದು
ಮತ್ತು
ನಾನೀಗ ಬಾಯಿ ಮುಚ್ಚಿಕೊಳ್ಳುತ್ತೇನೆ
ಉಳಿಯಲಿ ಬಿಡಿ
ನನ್ನ ತಳಮಳಗಳು ನನ್ನೊಳಗೇ
ಹಾಂ, ಹೇಳುವುದು ಮರೆತೆ..
ಆ ಶಾಂತವಾಗಿ ನಿಂತ ಮರವನು
ಎಂದೋ ಕಡಿದುಹಾಕಲಾಗಿತ್ತು
ಅದಿರುವುದರಿಂದಾಗಿಯೇ
ಮನೆಯಲಿ ಜಗಳವಾಗುವುವೆಂದು!
- ಕಾದಂಬಿನಿ
- ಕಾದಂಬಿನಿ
06 Oct 2018, 07:06 am
Download App from Playstore: