ನನ್ನ ನಿಟ್ಟುಸಿರಿಗೆ..
ನನ್ನ ನಿಟ್ಟುಸಿರಿಗೆ
ನನ್ನೆದೆಯ ಗುಟ್ಟು ಗೊತ್ತು
ಭಾರವಾದ ಅದನು ಹೊತ್ತು
ಹೊರನಡೆಯುವುದು ಗೊತ್ತು
ಪ್ರಿಯಾ..
ನಿನ್ನ ವಿಳಾಸವಷ್ಟೇ ಅದಕೆ ತಿಳಿಯದು
***
ನಾನು ಹೊಸದನ್ನೇನೋ ಹೇಳುವೆನೆಂದು
ಕಾದೂ ಕಾದೂ ನಿರಾಶನಾದೆಯಾ ಪ್ರಿಯಾ
ನಾನು ಬಂದಿರುವುದು
ಅವರು ಈಗಾಗಲೇ ಹೇಳಿಹೋಗಿರುವುದನು
ನನ್ನ ಮಾತುಗಳಲಿ ಪುನರಾವರ್ತಿಸಲು ಎಂದು
***
ನೋಡಿದೆಯಾ..
ನಿನ್ನ ಮಾತುಗನ್ನಡಿಯಲಿ
ನೀನು ತೋರಿಸಿದ ಹಾಗೆ
ನಾನು ಕಾಣುತ್ತೇನೆ.
***
ಹತ್ತಿಗೆ ಹತ್ತಿದ ಬೆಂಕಿ
ಹಬ್ಬಿದ್ದೇ ತಿಳಿಯುವುದಿಲ್ಲ
ನಿನ್ನ ಬುಡ ಸುಡತೊಡಗಿದ ಮೇಲೆ
ಅದೆಲ್ಲವೂ ನಿನಗೂ ತಿಳಿಯದೇ ಇರುವುದೂ ಇಲ್ಲ.
- ಕಾದಂಬಿನಿ
08 Oct 2018, 10:31 am
Download App from Playstore: