ಮೊಗ್ಗು ಬಿರಿದು ಹೂವಾಯ್ತು
ಪುಟ್ಟ ಬೊಚ್ಚು ಬಾಯಿ
ಎಳಸು ತುಟಿಯ ಲಾಯಿ
ಮುಂದೆರೆಡು ಹಲ್ಲು
ಬಾಯಿ ತುಂಬ ಜೊಲ್ಲು
ಬಾಯ್ದೆರೆದು ನೀ ನಕ್ಕರೆ
ಮಲ್ಲಿಗೆ ಮೊಗ್ಗೂ ಬಿರಿದು ಹೂವಾಯ್ತು
ಚೆಂಡನು ಅನುಮಾನಿಸುವ ಗುಂಡು ಮುಖ
ಪುಡಿ ಕೂದಲಿಗೆ ತಂಗಾಳಿ ಸಖ
ಕಮಲದ ಎಸಳ ನಯನ
ಕಪ್ಪೆಚಿಪ್ಪಿನಂತ ಮೂಗಿನ ತನನ
ನೋಡಿ ಚಂದಿರ ಮುದ್ದುಗರೆಯಲು
ಕಣ್ಣ ಹೊಳಪಲೆ ಅವನ ಕಾಂತಿ ಸೇರಾಯ್ತು
ತಿಕ್ಕಿ ತೀಡಿದ ಎಳಸು ಹುಬ್ಬು
ನೋಡಲು ಕೊಂಚ ಮಬ್ಬು
ಎರಡು ಕಾಮನಬಿಲ್ಲ ನಡುವೆ ಗುಂಡಗಿನ ಕಪ್ಪು
ನೋಡುವವರು ನಿನ್ನ ಕಂಡು ಬೆಪ್ಪು
ದೃಷ್ಟಿ ತಾಗದಂತಿಟ್ಟ ಬೊಟ್ಟೂ ದೃಷ್ಟಿಸಿ
ನಿನ್ನಂದ ಕಂಡು ದೃಷ್ಟಿ ತಾಗುವಂತಾಯ್ತು
ಪುಟ್ಟ ಪುಟ್ಟ ಮುದ್ದು ಕೈಕಾಲು
ನೀ ಸೋಕಿ ತೆರೆಯಿತು ಸಗ್ಗದ ಬಾಗಿಲು
ಕೇಕೆ ಹಾಕಿ ಚಪ್ಪಾಳೆ ತಟ್ಟಿ ಕುಣಿದು ಕರೆದರೆ
ಬಾಗಿ ಆಗಲೇ ಬೇಕು ನಿನಗೆ ಕುದುರೆ
ಚಿನ್ನಾಟದ ಚೆಲುವಿನಾಟಕೆ ಮುದ್ದಿಗೂ
ಮತ್ಸರ ಬಂದು ಮುಖ ತಿರುವಿ ನಿಂತಾಯ್ತು
- ಶ್ರೀಕಾವ್ಯ
09 Oct 2018, 02:53 pm
Download App from Playstore: