ಎರಡು ಹಳೆಯ ಸಾಲು..
(ಎರಡು ಹಳೆಯ ಸಾಲು)
1. ಕಣ್ಣು ಕಾಯುತಿವೆ
ಹಗಲುರಿದು ಸರಿದು ಇಳಿ ಸಂಜೆಯಾದರೂ ನಿರ್ಜನ ದಾರಿಗೆ ನೆಟ್ಟ ಕಣ್ಣು ಕಾಯುತಿವೆ
ಯುಗಗಳೇ ಸರಿದು ದಣಿದರೂ ತಣಿಯದೆ ಎದೆಕದ ತೆರೆದಿಟ್ಟು ಕಣ್ಣು ಕಾಯುತಿವೆ
ಯಾವ ಗರ್ಭದೊಳು ಮಿಡುಕುವ ಶೈಶವ ಜೀವ ಮತ್ತದೇ ದಾರಿಯೊಳು ಮಸಣಕೆ ಹೊರಟ ಶವ
ಇರುಳೆದೆಯೂ ಬಸಿಬಸಿದು ಒಸರುತಿದೆ ನೋವ ವೇದನೆಯೊಳದ್ದಿದ ಕಣ್ಣೀಗ ಯಾರ ಕಾಯುತಿದೆ..
ಗಾಳಿಗದುರಿರಬೇಕು ದಾರಿ ಮೇಲಿನ ತರಗೆಲೆ
ಕದಡಿತು ಮೌನದೆದೆಗಡಲು ಮೊರೆದೆದ್ದವಲೆ
ಕಸುವೆಲ್ಲಿಯದದು ತುಂಬಿ ಬಂದುದು ಕ್ಷಣದಿ ಬಂದವರಾರೆಂದು ತುಳುಕಿ ಕಣ್ಣರಳಿ ಕಾಯುತಿವೆ
ಋತುಗಳೂ ಒಂದೊಂದಾಗಿ ನಡೆದು ಸಾಗುತಿವೆ
ಹೂ ಹಣ್ಣು ಎಲೆ ಇದೇ ಹಾದಿಯೊಳುದುರಿಸಿ
ಕಾಲುಕೊಡವಿ ಹೊರಟೇ ಹೋದವರ ನೆನೆದು
ಹನಿ ಹನಿದು ಕಣ್ಣೇಕೋ ಇನ್ನೂ ಕಾಯುತಿವೆ
ಕಾವಳ ಇನಿಸಿನಿಸೇ ಸುರಿಯತೊಡಗಿದೆ ಸಖೀ ಹಾದಿಗೆದುರಾಗಿ ಎದೆಬಾಗಿಲಿನ್ನೂ ತೆರೆದೇ ಇದೆ
ರೂಹುತಳೆಯಲಿ ಈ ಇರುಳು ಪ್ರೇಮವೋ ಸಾವೋ ಆಲಿಂಗನಕೆ ಕಾತರಿಸಿ ಕಣ್ಣುರಿದು ಕಾಯುತಿವೆ
2. ಮುಚ್ಚಿಕೋ
ಆಡುವ ಬಾಯಿಗಳ ಮುಚ್ಚಲಾಗದೆಂದೂ ನಗೆಯ ಹರವಿ ಅಪಮಾನಗಳ ಮುಚ್ಚಿಕೋ
ಪ್ರೇಮವಿದು ಇರಿವ ಇಬ್ಬಾಯಿ ಕಟುಕತ್ತಿ
ಸೆರಗಿನೊಳಗೆ ಗಾಯಗಳ ಮುಚ್ಚಿಕೋ
ಸಂಜೆ ಸರಿದು ಗಾಢ ಕತ್ತಲು ಕವಿಯುತಿದೆ ಒಳಮನೆಯೊಳೊಂದು ದೀಪ ಹಚ್ಚಿಕೋ
ಬಿರುಗಾಳಿ ಬೀಸೀತು ಬೆಳಕು ಆರೀತು ಒಳಬರುವವರಾರಿಲ್ಲ ತಿಳಿದು ಕದವ ಮುಚ್ಚಿಕೋ
ನಕ್ಕ ಹಾಗೆಯೇ ನಟನೆ ಒಳಗೆ ಕುಟಿಲ ನೂರು ದುಃಖ ನುಗ್ಗಿದರೆ ತುಟಿಕಚ್ಚಿ ತಡೆದುಕೋ
ಬೆಸೆದ ಕೈ ಸಡಿಲಿಸೀತು ಮತ್ತಾರನೋ ಬಳಸೀತು ತುಳುಕುವ ಹನಿ ಕಾಣದಿರಲಿ ಕಣ್ಣ ಮುಚ್ಚಿಕೋ
ದೂರದವರ ಕೊರಳೆತ್ತಿ ಕೂಗಬಹುದು ಸಖೀ ಹೇಗೆ ಕರೆಯುವೀ ಮನಮುಚ್ಚಿ ಕುಳಿತ ಸನಿಹದವರ
ಯಾರ ಪಾತಕವಲ್ಲಿ ಯಾರೋ ನಗುವ ಸದ್ದಿಲ್ಲಿ ಕೆಸರೆರಚಿಹುದು ಬೊಗಸೆಯಲಿ ಮೊಗವ ಮುಚ್ಚಿಕೋ - ಕಾದಂಬಿನಿ
- ಕಾದಂಬಿನಿ
21 Oct 2018, 06:23 am
Download App from Playstore: