ಜಾವದ ಸಂದೇಶ..
ಜಾವದಲ್ಲಿ ನೀ ಕಳಿಸಿದ
ಎರಡು ಪದಗಳು
ನನ್ನ ಮನದ ಪಡಸಾಲೆಯಲಿ
ಸಿಲುಕಿದ್ದ ಚಳಿಯನ್ನು
ಬಡಿದೋಡಿಸಿದವು ಗೆಳತಿ!
ಅಪರೂಪದ ಬೆಡಗಿಯ
ಬಿನ್ನಾಣದ ನುಡಿಗಳ
ಎಣಿಸುತ ಗುಣಿಸುತ
ಎನ್ನ ಮನವನು ನಾನೇ ತಣಿಸುತ
ತಲ್ಲಣಗೊಂಡೆನಲ್ಲೇ..
ಎಂದೋ ನೀನುಟ್ಟ ಸೀರೆಯ ಜಲಕು
ನೆರಿಗೆಗಳ ಅಂದದ ಪಲಕು
ಮನದನಿಸಿಕೆಗಳು ಕದಡಿ ಕಲಕಿ
ಸೆರಗಿನಂಚಿಗೆ ನನ್ನ ಒಲುಮೆ ಸಿಲುಕಿ
ಕೊರಗಿ ಸೊರಗಿತಲ್ಲೇ ಹುಡುಗಿ..
ಬದುಕಿನ ಬರಿ ಬಂಡಿಯಲಿ
ಕುಲುಕುತ್ತ ಹೊರಟ ಪಯಣಿಗಳು ನೀನು..
ಬಂಡಿ ಓಡಿಸುವಾತನ ಹಂಗಿನಲಿ
ಸಿಲುಕಿದ ಹೊಂಗನಸು ಎಂದೋ ಹೊಸಕಿದೆ..
ಅಂಬಿಗನಿಲ್ಲದ ದೋಣಿಯಲಿ
ಕೂತಿರುವ ಒಬ್ಬಂಟಿ ನಾನು,
ಹುಟ್ಟು ಎಂದೋ ಕಳೆದು ಹೋಗಿದೆ
ದೋಣಿ ಸಾಗುತ್ತಿಲ್ಲ, ದಡವ ಸೇರುತ್ತಿಲ್ಲ
ಒಂಟಿ ಬಾಳಿಗೆ ಇಲ್ಲಿ ಕವಡೆ ಕಾಸಿನ ಕಿಮ್ಮತ್ತಿಲ್ಲ!
- ಶ್ರೀಗೋ.
21 Oct 2018, 08:06 am
Download App from Playstore: