#ಮಾತು ಮೌನದ ಸೆರಗಿನಲಿ
ಮಾತು ಮೌನದ ಸೆರಗಿನಂಚಲಿ
ಕಟ್ಟಿಟ್ಟ ಪುಡಿಗಾಸಿನಂತಾಗಿಬಿಟ್ಟಿದೆ
ಉಸಿರಾಡಲು ಪಾಪ ತುಸುವೂ
ಸ್ವತಂತ್ರವಿರದೇ ಕಷ್ಟವಾಗಿರಬೇಕು
ಜೀವ ಬಾಯಿಗೆ ಬಂದು
ಉಸಿರು ನಿಂತಂತಾಗಿ
ಮೈಯೆಲ್ಲ ತಣ್ಣಗೆ ಕೊರೆಯುತಿರುವಂತಿದೆ
ಜೀವ ಉಳಿಸಿಕೊಳ್ಳಲು ಹಾತೊರೆಯುತಿದೆ
ಹಿಂದೊಮ್ಮೆ ರಾಜನಂತೆ ಮೆರೆದು
ಮನದ ರಾಜ್ಯದಲ್ಲೆಲ್ಲ ಠೀವಿಯಿಂದ
ಸಂಕೋಚ ಸಂಕೋಲೆಗಳೇ ಇರದೆ
ಬದುಕಿದವನಿಗೆ ಸಂಕಟವಾಗಿರಲೇಬೇಕು
ಅದಕೂ ಬಿಡುಗಡೆ ಪಡೆಯುವ ಆತುರ
ನನಗೂ ಆ ಚತುರನ ಸಂಧಿಸುವ ಅವಸರ
ಬಿಡುಗಡೆಯ ದೊರಕಿಸಿ ಅವನ ರಾಜ್ಯಭಾರವ
ನನ್ನೊಳಗೂ ಕಂಡು ಕುಣಿದು ಕುಪ್ಪಳಿಸುವಾಸೆ
ಬಂಧಿಯಾಗಿಸಿ ಮಾತನು ನಿರ್ಭಂದಿಸಿ
ತನ್ನೊಳಗೆ ಗೌಣವಾಗಿಸಿ ನಿಂತಿರುವ
ಘಟಾನುಘಟಿ ಮೌನದ ಹಿಂದೆ ಅಲೆಯುತಿರುವೆ
ಅಮ್ಮನ ಸೆರಗಿನಂಚಿನ ಪುಡಿಗಾಸಿಗೆ ಅಲೆವ ಮಗುವಿನಾಗೆ
- ಶ್ರೀಕಾವ್ಯ
05 Nov 2018, 05:38 am
Download App from Playstore: