ಜೋಡಿ ದೀಪ
ಇರುಳಗತ್ತಲ ಮರೆತು
ಒಲವ ಹಾಡನು ಕಲಿತು,
ಹುಡಿಮಣ್ಣ ಘಮವ ಹಂಚಿಕೊಳ್ಳುತ್ತಿವೆ ಜೋಡಿ ದೀಪ ಜೊತೆಯಾಗಿ ಇಂದು.
ಬಿಸಿಯ ಶಾಖಕೆ ಬೆಂದು ಬೆವರ ತಾಪಕೆ ನೊಂದು ಮತ್ತೆ ಉಸಿರ ಪಡೆಯುತ್ತಿವೆ ಎಣ್ಣೆಯಲಿ ಮಿಂದು.
ಬತ್ತಿ ಬೇಡಿದ ಹೆಸರು ಮಣ್ಣಿಗಂಟಿದ ಕೆಸರು
ಮೈಯ ತುಂಬಿದೆ ಇಂದು
ಬಿಡದ ನಂಟಿನ ಪಸರು.
ನೆರಳು ನಾಚಿದೆ ನೋಡು
ಮಿಲನ ಭಾಷೆಯ ಅರಿತು,
ಜಿನುಗು ಜಾವದ ಕುರಿತು
ನುರಿತ ಮನವನು ಅರಿತು.
ತುತ್ತತುದಿಯಲಿ ಬೆಳಕು
ಕಣ್ಣು ಮುಚ್ಚಿದ ಘಳಿಗೆ
ಕತ್ತಲಾವರಿಸಿತು ಮತ್ತೆ
ಆಡಲು ಮಾತು,
ಬೂದಿ ಬಣ್ಣವ ಹಚ್ಚಿ
ನೆಲದಿ ನಿನ್ನ ರೂಪಕೆ ಇಂದು
ಜೋಡಿ ದೀಪದಿ ಕುಂತು..
- ಚುಕ್ಕಿ
09 Dec 2018, 06:36 am
Download App from Playstore: