ಹೃದಯಕೆ ಹಚ್ಚಿದ ಬಣ್ಣ
ವಿರಹಕೆ ಒಡೆದು ಚೂರಾದ
ಹೂಗಳ ಮೈಸಿರಿ ನಿನ್ನ ಸೇರಿ
ಬಣ್ಣವಾಗಿಹುದು ನನ್ನೆದೆಯ
ಮೀಟಿ ರಂಗೆರಚಿಕೊಳ್ಳಲು.
ಹೃದಗಳ ಮೃದು ಗುದ್ದಾಟಕೆ
ಗುಲಾಬಿ ನಾಚಿ ಕೆಂಪಾಯಿತು,
ಇಳಿಸಂಜೆ ಜಾರುತಿರಳು
ಮುಂಜಾನೆಯ ನಿನ್ನ ನೆನಪು ತುಸು
ಕೋಪಗೊಂಡು ಕಂದಾಯಿತು.
ಕಪ್ಪಾದ ಆಗಸದಲ್ಲಿ ಮೋಡ
ಮುದ್ದಾಡಿ ಕರೆತಂದ ಚಂದಿರನ
ತಂಪು ಬಿಳುಪಾಯಿತು,
ನೀ ಮುಡಿಸಿದ ಸಂಪಿಗೆ ಸರಸದಿ
ಸಾವನಪ್ಪಿ ,ಅಪ್ಪುಗೆಯ ಬಿರುಸಿಗೆ
ನೆಲಕ್ಕೆ ಜಾರಿ ಹಳದಿಯಾಯಿತು.
ಕಣ್ಣ ಸೇರಿ ಪ್ರೀತಿ ಆಳ ತಿಳಿಯುವ
ಕಿಡಿಗೇಡಿ ಮನಕೆ ನಿನ್ನ ಪ್ರೀತಿ
ಅಂತ್ಯವಿಲ್ಲದ ನೀಲಿಯಾಯಿತು,
ಒಳ ಬಂದ ತಪ್ಪಿಗೆ ಹೊರಬಿಡದೆ
ಶಿಕ್ಷೆ ನೀಡಿ,ಅನುನಿತ್ಯ ಕಿತ್ತಾಡಿ ಮತ್ತೆ
ಮುದ್ದಾಡಿ ನಿನ್ನೊಲವಿನ ಬಣ್ಣವೊಂದು ಕಿತ್ತಾಳೆಯಾಯಿತು.
ಒಲವ ಮಳೆಗೆ ಕಾದು ಕಾದು ಒಣಗಿದ್ದ
ನೂರಾಸೆ ವಸಂತದ ಚಿಗುರು ಸವಿದು
ನಿನ್ನುಸಿರಲಿ ಹಸಿರಾಯಿತು, ನಿನ್ನಲ್ಲಿ ನನ್ನಂತೆ
ನನ್ನಲ್ಲಿ ನಿನ್ನಂತೆ ಹಪಹಪಿಸಿ ಹಸನಾಗಿ
ಹಾಳಾಯಿತು ಈ ಪ್ರೀತಿ ಪೋಲಿಗಳ
ಸಹವಾಸದಲ್ಲಿ ಹೆಸರಿಲ್ಲದ ಬಣ್ಣವಾಗಿ.
- ಚುಕ್ಕಿ
20 Mar 2019, 09:32 pm
Download App from Playstore: