ನೀಲಿ ಕುರಿಂಜಿ
ಕೋಲು ದೀಪ ಹಿಡಿದು ನೀಲಿ ಕುರಿಂಜಿ
ಮುಡಿದು,ಮುಂಜಾವು ಮಂಜು ಸರಿಸುತ್ತಾ
ಮಿಂಚು ಕಂಗಳ ಮಡದಿ ಕಂಬಳಿ ಕುಪ್ಪೆ
ಹೊದ್ದು ನಡೆದಿಹಳು ನಾಜೂಕು ಪಾದಕ್ಕೆ
ಕೆಮ್ಮಣ್ಣ ಸವರುತ್ತ.
ಹಗಲಿರುಲೆನ್ನದೆ ಅಡಿಕೆ ಒಲೆಯಡಿಯಲ್ಲಿ
ಮಸಿಯಾಗಿ ದುಡಿವ ಗಂಡನ ಹಬ್ಬದಂದಾದರು
ಮನೆಗೆ ಕರೆತರಲು ಹೊರೆಟಿಹಳು ಯಜಮಾನ್ತಿ
ನೆರಿಗೆ ಬಿಗಿ ಹಿಡಿದು ದಾರಿಹೋಕರಿಗೆಲ್ಲ
ದೂರು ನೀಡುತ್ತಾ.
ಎಲ್ಲಿಹನೋ ನನ್ನವನು ಯುಗ ಕಳೆದು
ಹೋಯ್ತು ಮತ್ತೆ ಯುಗಾದಿ ಬಂದಾಯ್ತು
ಒಮ್ಮೆಯಾದರೂ ಕಂಡುಬಾರೋ
ಮನದೊಡೆಯನೇ ಮನೆಗೆ ಹೋಗುವ
ಎನ್ನುತಲಿ ನಡೆದಿಹಳು ಸರಸತಿ ಹಾಡ ಕಟ್ಟುತ್ತಾ.
ಕೇಸು ಗಂಟಿನ ಪಲ್ಯ, ಕಡ್ಬು ಕೋಳಿತುಂಡು
ಅನ್ನ ಅಪ್ಪೆಕಾಯಿಸಾರು, ಕೋಸಂಬರಿ ಕೊನೆಗೊಂಚೂರು ವಿಳೆದೆಲೆ ಸವಿಯುವಂತೆ
ಒಮ್ಮೆ ಕಂಡುಬಾರೋ ಕಿವಿಹಿಂಡಿ
ಎಳೆದೊಯ್ಯುವೆ ಮಾರು ಮಾತನಾಡದಿರು
ಮತ್ತೆ ಕೋಪಗೊಳ್ಳುವೆನೆಂದು ತನ್ನಲ್ಲೇ
ಅಂದುಳ್ಳುತ್ತಾ.
- ಚುಕ್ಕಿ
15 Jun 2019, 04:12 pm
Download App from Playstore: