ಗೂಗಲ್ಲು
ಗಲ್ಲಿ ಗಲ್ಲಿಯಲ್ಲಿ ಗೂಗಲ್ಲಿನಾ ಗುಂಗು
ಕಿವಿಯೆಲ್ಲ ಮನವೆಲ್ಲ ಗೂ ಎಂದು ಗಲ್ಲೆಂದು
ಕೇಳಲೂ ಎಲ್ಲರ, ಇದೆಯೇ ಗೂಗೆಗೂ ಹಲ್ಲೆಂದು
ಓಡುವರು ಎಲ್ಲರೂ ಗೂಗಲ್ಲು ಎಲ್ಲೆಂದು
ಗರತಿ ಗಂಗವ್ವಳಾ ಪೂಜಾಗೂ ಗೂಗಲ್ಲು
ಗವಿಸಿದ್ದ ವಚನವಾ ಓದಲೂ ಗೂಗಲ್ಲು
ಗದ್ದುಗೆಯ ಸ್ವಾಮಿಗಳ ಕೈಯಲ್ಲು ಗೂಗಲ್ಲು
ಗಲ್ಲಿಗೇರುತಿಹ ಖೈದಿಯಾ ಕೈಯಲ್ಲಿ ಗೂಗಲ್ಲು
ಗಾಂಪನೂ ನೋಡುತಿಹ ದಿನವಿಡಿಯು ಗೂಗಲ್ಲು
ಗಾವಿಲನ ಕೆಲಸವೂ ಸಾಗದು ಇಲ್ಲದಿರೆ ಗೂಗಲ್ಲು
ಕೆಳಿರೀ ಪೋರನನು ಬ್ರಹ್ಮ ಜ್ಞಾನವದು ಏನೆಂದು
ಮೌನದಲಿ ತೋರುವನು ಜಾಲವದು ಗೂಗಲ್ಲು
ಗುರುಗಳಿಗೆ ಪಠಿಸಲೂ ಬೇಕದುವೆ ಗೂಗಲ್ಲು
ಶಿಷ್ಯರಿಗೆ ಗುಣಿಸಲೂ ಬೇಕಲವೇ ಗೂಗಲ್ಲು
ಸುದ್ದಿ ಸಮಾಚಾರ ತಿಳಿಯುವುದಕು ಗೂಗಲ್ಲು
ವ್ಯಾಪಾರ ವ್ಯವಹಾರ ಎಲ್ಲದಕು ಗೂಗಲ್ಲು
ಸಂದೇಹ ನನಗೊಂದು -
ಬರುವುದೇ ಮುಂದೊಂದು ದಿನವೊಂದು
ಇಲ್ಲದಿರೆ ಗೂಗಲ್ಲು ಆಗುವುದೆ ಜೀವನವೆ ಗಲ್ಲು??
- ಜೈಮಿನಿ
12 Oct 2019, 01:08 am
Download App from Playstore: