ಅಮೃತ ಬಿಂದು
ಈ ದಿವಾಳಿ ದಿನದಲ್ಲಿ ಮುಂಜಾನೆ ನಸುಕಿನಲಿ
ಕಪ್ಪಾದ ರಸ್ತೆಯಲಿ ಓಡುತಿರೆ ರಭಸದಲಿ
ಕಂಡಿದ್ದೆ ಬಸವನಾ ಹುಳವೊಂದು ದಾಟುವುದ
ರಸ್ತೆಯನು ಮಂದ್ರದಲಿ ಹಾಯಾಗಿ ಸುಖದಲ್ಲಿ
ಆಗಾಗ ಕೋಡಲ್ಲಿ ಪ್ರಕೃತಿಯ ಸವಿಯುತ್ತ
ಕೆಲ ಕ್ಷಣದಿ ತಿಷ್ಠದಲಿ ಎಳೆಯನ್ನೇ ಮೆಲ್ಲುತ್ತ
ನನಗಾಗ ಅನಿಸಿತ್ತು ಬದುಕಲ್ಲಿ ನನ್ನೋಟ
ಕಣ್ಣನ್ನು ಕಟ್ಟಿದಾ ಹಯವದುವೆ ನೋಡಿಲ್ಲಿ
ಎಲ್ಲಿಗದು ಏತಕದು ಗೊತ್ತಿಲ್ಲ ಗುರಿಯಿಲ್ಲ
ಮಾಲೀಕ ಚಾಬೂಕು ಬೀಸಿರಲು ಓಡಿರುವೆ
ಐಶ್ವರ್ಯ ಐಭೋಗ ಪಡೆಯಲದು ತಿಣುಕಿ
ಮಾತ್ಸರ್ಯ ಮದವೇರಿ ಎಲ್ಲರನು ಕೆಣಕಿ
ಕಳಕೊಂಡೆ ಜೀವನದ ಸಂತಸದ ಕ್ಷಣಗಳ
ಚಿಕ ಚಿಕ್ಕ ಮುದಗೊಡುವ ಅಮೃತದ ಬಿಂದುಗಳ !!
- ಜೈಮಿನಿ
31 Oct 2019, 05:51 am
Download App from Playstore: