ಮಂಗಳಮುಖಿಯು ನಾನು

ಮಂಗಳಮುಖಿಯು ನಾನು
ಅವನಿಂದ ಅವಳಾದೇನು,
ಹಡೆದವ್ವನ ಮಡಿಲಿಗೆ ಭಾರವಾದೆನು
ಸಮಾಜದ ಮಾತಿಗೆ ತಲೆಬಾಗುವ
ತಂದೆಗೆ ಬೇಡವಾದೆನು.

ಒಡಹುಟ್ಟದವರು ಅಕ್ಕ
ತಂಗಿಯರಾದರು,
ಎದೆಯಾಲ ಉಣಿಸದ ಅಮ್ಮ
ತಾಯಿಯಾದಳು,
ಮಗನ ಕೊಡದ ಅತ್ತೆ ಮಾಂಗಲ್ಯ
ಕಟ್ಟಿ ಅತ್ತೆಯಾದಳು.

ಮಂಗಳಮುಖಿಯು ನಾನು,
ಊರಮಂದಿ ಮೂಗು ಮುರಿದು
ಸಾಗುವರು ಅಂಟಿ ಮುಟ್ಟದ ಹಾಗೆ
ಮೈಯ ಸೋಕಿದರೆ ಕಳಂಕವೆಂದು.

ಜೀವನ ನೀಡದಿದ್ದರೂ ಪರವಾಗಿಲ್ಲ
ಜೀವವಿಂಡುವ ಮಾತನಾಡಬೇಡಿ
ನನ್ನಲಿಲ್ಲದ ನ್ಯೂನತೆಗಳನ್ನು ನೀವು
ತುಂಬಿಕೊಳ್ಳಬೇಡಿ.

ಓದುವ ಹಕ್ಕು ಮೊದಲೇ ನನಗಿಲ್ಲ
ಮನಸಿಗಿಲ್ಲದ ದೋಷ ಮೈಯಿಗಂಟಿಸಿ
ಬಿಡುವರಲ್ಲ, ಚಿಗುರು ಆಸೆಗಳ ನಗುವು
ಆದಿಯಲ್ಲೇ ಅಂತ್ಯ ಕನಸು ಕಾಣುವ
ಕಣ್ಣಿಗೆ ಕರಾಳ ರಾತ್ರಿಗಳೇ ನಿತ್ಯ.

ಮಂಗಳಮುಖಿಯು ನಾನು,
ಉಜ್ಜುಗದ ಗೋಜಿಗೆ ಹೋಗುವ
ಹಾಗೆಯೇ ಇಲ್ಲ ಬೆವರ ಬೆಲೆ ನನಗೆ
ತಿಳಿದಿದ್ದರೂನು ನನ್ನ ಬೆಲೆ ತಿಳಿದವರು
ಇಲ್ಲಿ ಯಾರು ಇಲ್ಲ.

ಹೊಟ್ಟೆ ಪಾಡಿಗಾಗಿ ಭಿಕ್ಷೆಬೇಡುವೆ
ನನ್ನಪಾಲಿನ ಅನ್ನವನ್ನೂ ಹಂಚಿ ತಿನ್ನುವೆ,
ಕೋಜಾ ಎನ್ನುವರು ಕೆಲವರು ಹಿಜರಾ
ಎನ್ನುವವರು ಅಲವರು.

ನಿಮ್ಮ ಮಾತಿಗೆ ಮನದಲ್ಲಿ ಕಿಂಚಿತ್ತೂ
ಬೇಸರವಿಲ್ಲ ನಗೆಯೊಂದು ಮೂಡುತ್ತದೆ
ನಿಮ್ಮ ಸಣ್ಣ ಮನಸ್ಥಿತಿಯನು ನೋಡಿ.

ನಿತ್ಯ ಸುಮಂಗಳಿಯು ನಾನು ನನ್ನಂತೆ
ನಿಮ್ಮ ಬಾಳು ಆಗದಿರಲಿ ಎಂದು ಆ ಅರ್ಧನಾರೀಶ್ವರನಲ್ಲಿ ಅನುನಿತ್ಯ ನಾ
ಮೊರೆಯಿಡುವೆನು.

- ಚುಕ್ಕಿ

16 Feb 2020, 02:52 pm

---

Download App from Playstore: