ಬಂತು ನೋಡು ಯುಗಾದಿ

ಯುಗ ಯುಗದ ಆದಿ
ನವ ಯುಗಕೆ ಹಾದಿ
ಬಂತು ನೋಡು ಯುಗಾದಿ!!
ನವ ಉಲ್ಲಾಸದಿಂದ
ನವ ಉತ್ಸಾಹದಿಂದ
ಬಂತು ನೋಡು ಯುಗಾದಿ!!

ಚೈತ್ರ ಶುದ್ಧ ಪಾಡ್ಯ ದಿನ
ಈ ಸೃಷ್ಠಿಯ ಮೊದಲ ದಿನ
ಬಂತು ನೋಡು ಯುಗಾದಿ!!
ನಭ ಚುಕ್ಕಿ ಗ್ರಹಗಳ ಕೂಟ
ಬದಲಾದ ಚಲನಾ ನೋಟ
ಬಂತು ನೋಡು ಯುಗಾದಿ!!

ನವ ಪರ್ವಕಿದೋ
ಚಿರ ಚೇತನವ ತುಂಬಿ
ಬಂತು ನೋಡು ಯುಗಾದಿ!!
ಸಂತಸದಿ ನಿಂದು
ಸಂಭ್ರಮದಿ ಮಿಂದು
ಬಂತು ನೋಡು ಯುಗಾದಿ!!

ಗೆಲುವನ್ನು ಭರಿಸಿ
ಸೋಲನ್ನು ಮರೆಸಿ
ಬಂತು ನೋಡು ಯುಗಾದಿ!!
ಸಿಹಿ ಕಹಿಯು ಬೆರೆತು
ಬದುಕನ್ನು ಅರಿತು
ಬಂತು ನೋಡು ಯುಗಾದಿ!!

ಹೊಂಬೆಳಕ ತಂದ
ನೇಸರನ‌ ಚೆಂದ
ಬಂತು ನೋಡು ಯುಗಾದಿ!!
ಚಿಗುರೆಲೆಯ ಸ್ಪರ್ಷ
ವನಸಿರಿಗೆ ಹರ್ಷ
ಬಂತು ನೋಡು ಯುಗಾದಿ!!

ಭೂರಮೆಯ ಚೆಲುವು
ಅರಳಿರುವ ಸುಮವು
ಬಂತು ನೋಡು ಯುಗಾದಿ!!
ದುಂಬಿಗಳ ಬಂಧ
ಹೂ ಬನದ ತುಂಬ
ಬಂತು ನೋಡು ಯುಗಾದಿ!!

ಹೊಸ ವರ್ಷದ ಆರಂಭ
ಎಲ್ಲೆಲ್ಲೂ ಪ್ರಾರಂಭ
ಬಂತು ನೋಡು ಯುಗಾದಿ!!
ಬೇವು ಬೆಲ್ಲ ಹಂಚಿರೆಲ್ಲ
ಸುಖ ದುಃಖ ಮರೆಸಿರೆಲ್ಲ
ಬಂತು ನೋಡು ಯುಗಾದಿ!!

- ಪಿ.ಜಿ.ಜ್ಯೋತಿ

25 Mar 2020, 02:12 pm

---

Download App from Playstore: