ಬರುವನೆನ್ನ ಕಂದ
ಕಾತರಿಸಿದೆ ಮನ
ಬರುವ ನನ್ನ ಕಂದನಿಗಾಗಿ,
ನನ್ನೊಲುಮೆಯ ಪಟ್ಟದರಸಿಯ
ಹೊಟ್ಟೆಯೊಳಗೆ ಕಳೆದು
ಒಂಬತ್ತು ತಿಂಗಳು,
ತಳೆದು ಮೆದು ಮೈ ಮನಸುಗಳ
ಕಾಲಿಡುವನು ನೆಲಕೆ,
ಕತ್ತಲ ಲೋಕದಿಂದೊಮ್ಮೆ
ಬೆಳಕಿನಂಗಳಕೆ..
ಬರುವ ಕಂದನ ಹೊಗಳಲು
ಸಾಲದು ಪದಗಳ ಹೊಳಲು,
ಕಣ್ತುಂಬಿಕೊಳಲು ಕಾದಿವೆ ಕಂಗಳು,
ಮುಟ್ಟಿದರೆ ಮುನಿವನೋ,
ತಾಯಿ ಎದೆಯೊಳಗೆ ಹುದುಗಿ
ಮೈ ಮುರಿವನೋ..
ಬರಲಿರುವ ಕಂದ
ಅರಸನೋ, ಅರಸಿಯೋ ಅರಿತವರಿಲ್ಲ
ಹೊತ್ತು ತಿರುಗುವೆ ಪುಟ್ಟ ಕೂಸನು
ನಾನೆಂದಿಗೂ ಅವಳ ಕಾಲಾಳುವಾಗಿ..
- ಶ್ರೀಗೋ.
05 May 2020, 07:45 am
Download App from Playstore: