ಪ್ರೀತಿ
ಅಲ್ಲಿಹುದು,
ಇಲ್ಲಿಹುದು,
ಎಲ್ಲಿಹುದು ಪ್ರೀತಿ ?
ಅಣುವಾದಿ ಅನಂತದೊಳಡಗಿಹುದು ಪ್ರೀತಿ
ಬಸಿರ ಪೊತ್ತು ಹಡೆದವಳ ಮಡಿಲೊಳಗೆ ಪ್ರೀತಿ
ಭುಜದಿ ಹೊತ್ತು ನಡೆದವನ ತೋಳೊಳಗೆ ಪ್ರೀತಿ
ಅಕ್ಕರದಿ ಅಕ್ಷರಮಿತ್ತ ಗುರುವೊಳಗೆ ಪ್ರೀತಿ
ತಾಯ್ನುಡಿಯ ಸವಿಜೇನ ಸುಧೆಯೊಳಗೆ ಪ್ರೀತಿ
ಸೋದರಿಕೆಯಾದರದ ಅಪ್ಪುಗೆಯೆ ಪ್ರೀತಿ
ಮನದನ್ನೆಯುಂಗುರದ ಒಪ್ಪುಗೆಯೆ ಪ್ರೀತಿ
ಅಳುವ ಕಂದನ ತೊದಲು ನುಡಿಗಳದು ಪ್ರೀತಿ
ಉಳುವ ರೈತನ ಬೆವರ ಹನಿಗಳದು ಪ್ರೀತಿ
ಹರ ಕುಣಿದ, ಹರಿ ತಿರಿದ, ರವಿ ಸುರಿದ, ಕವಿ ಬರೆದ
ಎಲ್ಲಕ್ಕು ಮೊದಲಾಗಿ ಕಾರಣವು ಪ್ರೀತಿ,
ವಸುಂಧರೆಯ ಒಡಲೊಳಗು ಸದಾ ಮೊರೆವ ಕಡಲೊಳಗು
ತುಂಬಿಹುದು ಆನಂದದಿoಬುಗೆಯ ಪ್ರೀತಿ,
ನಾನಳಿಯೆ, ನೀನಳಿಯೆ, ಜನರಳಿಯೆ, ಜಗವಳಿಯೆ
ಇದಕುಂಟೆ ಆದಿ ?
ಇದಕುಂಟೆ ಅಂತ್ಯ ?
ಯುಗಕಳೆದು ಮಗದೊಂದು ಯುಗಮುಗಿಯೆ
ಬಿರಿಯುವುದು ಪ್ರೀತಿ......
ಮೆರೆಯುವುದು ಪ್ರೀತಿ.....
ಭೋರ್ಗರೆಯುವುದು ಪ್ರೀತಿ...........
- Darshan Bidare
14 Feb 2021, 01:54 pm
Download App from Playstore: