ನನ್ನರಸ ಸುಮ್ಮನಿರಿ ಎಂದಳೇಕೆ?
ನನ್ನರಸ ಸುಮ್ಮನಿರಿ ಅಂದಳೇಕೆ?
ನಿತ್ಯ ಮುಸ್ಸಂಜೆಯಲಿ, ಮನೆ ಮುಂದಿನ ಬನದಲ್ಲಿ
ನನ್ನಾಕೆ, ನೆರೆಯಾಕೆ ಸೇರಬೇಕೇ?
ಸೂರ್ಯನತ್ತ ತೆರಳುವಲ್ಲಿ, ಕತ್ತಲೆಯ ಸೆರಗಲ್ಲಿ
ಅವರಿವರ ಮೇಲೆ ಬೆಳಕು ಚೆಲ್ಲಬೇಕೆ?
ವಿಷಯವೇ ಇಲ್ಲದಾಗ, ಮಾತಿನಂಗಳದಾಗ
ಮತ್ತೊಂದು ಹುಟ್ಟಲೇ ಬೇಕೇ? ಇದಕೆ ಶಂಕೆ ಏಕೆ?
ನಮ್ಮವರೇ ಚಂದವೋ, ನಿಮ್ಮವರೇ ಚಂದವೋ
ಎಂದಿವಳು ಪಕ್ಕದವಳ ಚಕ್ಕನೇ ಕೇಳಬೇಕೇ?
ನಮ್ಮವರು ಬರಿ ಅಂದವು, ನಿಮ್ಮವರೇ ಬಲು ಚಂದವು
ಎಂದವಳು ತುಟಿಯ ತಾ ಕಚ್ಚುತ ಹೊಗಳಬೇಕೇ?
ನನ್ನವಳ ಕೆನ್ನೆಯದು, ಕಮಲದಂತೆ ಹಿಗ್ಗುತಿರಲು
ಹುಸಿನಗುವ ಅವಳತ್ತ ತೂರಿ ತೋರಲೇಕೇ?
ಅವಸರದಿ ತಾ ಬೇಗನೆ, ನೆಪವ ಹೇಳಿ ಮೆಲ್ಲನೇ
ಸಂಶಯದಲಿ ಇವಳೋಡಿ ತಾ ಬಂದಳೇಕೇ?
ಅವಳ ಬಳಿ ನಿಮಗಿನಿತು ಇಂತದೊಂದು ಸಲಿಗೆಯೇಕೆ
ಎಂದೆನ್ನ ಕೇಳಿ ತನ್ನ ಬೆರಳ ತೋರಲೇಕೆ?
ಅವಳ ನೆರಳು ನಿಮ್ಮ ಮೇಲೆ, ನನ್ನರಸ ಬೇಡ ಜೋಕೆ
ಎಂದೆನ್ನ ಕೆನ್ನೆ ನನ್ನರಸಿ ಚಿವುಟಲೇಕೇ?
ಇವಳೇಕೋ ಮೌನಿಯಾಗಿ, ಅವಳಿಗೂ ತಿಳಿಯದಾಗಿ
ಕಣ್ಣೆಂಜಲು ಬಿದ್ದಿವರ ಮಾತು ನಿಲ್ಲ ಬೇಕೇ?
ನಮ್ಮವರೇ ಚಂದವೋ ನಿಮ್ಮವರೇ ಚಂದವೋ
ಎಂದು ಪಕ್ಕದವಳ ಕೇಳುತ ಮುನಿಯಲೇಕೆ?
ನೀನೇ ನನ್ನ ಮಲ್ಲಿಗೆ, ಅವಳೋ ಕೆಂಪು ಸಂಪಿಗೆ
ಅನ್ನಲು, ನನ್ನರಸ ಸುಮ್ಮನಿರಿ ಅನ್ನಬೇಕೆ.
ರಚನೆ: ಡಾ. ಪ್ರಭಾಕರ್ ಬೆಲವಾಡಿ
(ಕೆ.ಎಸ್.ಏನ್. ಅವರಿಗೆ ನಮಿಸುತ್ತಾ)
Sent from Mail for Windows
- ಡಾ. ಪ್ರಭಾಕರ್ ಬೆಲವಾಡಿ
14 Jan 2022, 06:59 pm
Download App from Playstore: