ಲಲಿತ ಲಯ ಛಂದೋಬದ್ಧ ರಚನೆ
ಹೊಂಗೆಯಾ ನೆರಳಲ್ಲಿ
ಹೊಂಗೆಯಾ ನೆರಳಲ್ಲಿ ತುಂಗೆನೀ ಬಂದಾಗ /
ರಂಗಿನಾ ಹೂವುಗಳು ಕುಣಿದಾಡಿವೆ//
ಅಂಗುಲಂಗುಲದಲ್ಲು ರಂಗಿನೀ ತಂಗುತ್ತ/
ಕಂಗಳಿವು ಹೊಸಗಾನ ತಾಹಾಡಿವೆ //
ಮರದಡಿಯ ಹೂವುದುರಿ ಕರದಲ್ಲಿ ನೀಸುರಿದು /
ಸರಸದೊಳು ಹೂಮುತ್ತು ನೀನೀಡಿದೆ //
ಮರಬಾಗಿ ಪಿಸುಮಾತ ಸರಸರನೆ ಕೇಳುತ್ತ/
ನೆರವಾಗಿ ತಂಗಾಳಿ ತಾಸವರಿದೆ //
ಅಳಿಲೊಂದು ಚೆಲುವೆಯಾ ಬಳಿಯಲ್ಲಿ ಸುಳಿದಾಡಿ /.
ಬಳಿಸಾರಿ ಚುಂಬನವ ತಾನೀಡಿದೆ //
ನಳನಳಿಸಿ ನಳಿನಮುಖಿ ಕಳೆಗೊಂಡು ಮಿಂಚುತ್ತ /
ಫಳಪಳನೆ ಮುಗುಳುನಗೆ ಹೊರಚೆಲ್ಲಿದೆ //
ಅಲ್ಲೆಲ್ಲೊ ಕೋಗಿಲೆಯು ಮಲ್ಲೀನ ಕರೆಯುತ್ತ /
ಬಿಲ್ಲಿನಾ ಹುಬ್ಬಿನೊಳು ಸುಮಬಾಣವು //
ಎಲ್ಲೆಲ್ಕು ನೋಡಿದರು ಚೆಲ್ಲಿನೀ ಕುಳಿತಿರುವೆ /
ಮೆಲ್ಲುಸಿರು ಸಂಗೀತದಾತಾಣವು //
ಎಳೆನೀರೆ ಕುಡಿಯುತ್ತಲಾನೀರೆ ಹೊರಚೆಲ್ಲಿ /
ಜಳಕದಲಿ ಕಂಚುಕವು ನಲಿದಾಡಿದೆ //
ಪುಳಕದೊಳ್ ನೀನಕ್ಕು ಕಳೆಯೇರಿ ವದನದೊಳ್ /
ದಳಬಿರಿದು ಜೇನುಕ್ಕಿ ಕುಣಿದಾಡಿದೆ //
ಕಲ್ಲೆಸೆದು ಕೊಳದೆಡೆಗೆ ಚೆಲ್ಲುತ್ತ ನಿನ್ನಮನ /
ಜಲ್ಲೆಂಬ ಭಾವಗಳು ಸುತ್ತುತ್ತಿವೆ //
ಮಲ್ಲಿಗೆಯ ಮಾಲೆನೀ ಮುಡಿಸೇರಿ ಸಾರ್ಥಕವು /
ಮಲ್ಲಿಯಾ ಕನಸುಗಳು ಕತ್ತೆತ್ತಿವೆ//
ಶಿವಪ್ರಸಾದ್ ಆರಾಧ್ಯ ಮಲ್ಲರಬಾಣವಾಡಿ ನೆಲಮಂಗಲ
- shivaprasad aradhya
11 Apr 2026, 10:48 am
Download App from Playstore: