ಇಳಿಸಂಜೆ ಕಳೆದಮೇಲೆ
ಇಳಿಸಂಜೆ ಕಳೆದಮೇಲೆ ಇನ್ನೇನು ಉಳಿದಿದೆ
ಹಸಿದ ಹಕ್ಕಿ ಸೇರೋ ಮುನ್ನ ಗೂಡು ಏನನೋ ಉಸುರಿದೆ
ದಿನವೆಲ್ಲಾ ಅರಳಿ ನಿಂದ ಹೂವ ಬೇಸರ ಕಾಡಿದೆ....
ದಿನವಿಡೀ ರಮಿಸಿ ಜೇನ ಹೀರಿದ ದುಂಬಿಯ ಹುಡುಕಾಡಿದೆ...
ಬಿಟ್ಟೂಬಿಡದೇ ಮತ್ತೆ ಜಡಿಮಳೆ ಧಾರೆಯಾಗಿಯೇ ಸುರಿದಿದೆ...
ಬಿಟ್ಟುಹೋದ ಅವನ ನೆನಪಲಿ ಕಣ್ಣೀರು ಗಲ್ಲವ ಸೋಕಿದೆ...
ಸಂಜೆ ಕಳೆದಿದೆ ಮಬ್ಬು ಹಬ್ಬುತಿದೆ ಎಣ್ಣೆಮುಗಿದ ದೀಪ ನಕ್ಕಿದೆ...
ಒಡೆದ ಹಂಚಿಂದಿಳಿವ ಮಳೆಹನಿ ಒಳಗೂ ಶಾಂತಿಯ ಕದಡಿದೆ...
ಮುಗಿದ ಸಂಜೆಗೆ ಉತ್ತರವಿಲ್ಲ ಹಳೆಯ ಕನಸು ಕನವರಿಸುತ್ತದೆ
ಬರುವ ನಾಳೆಗೆ ಭರವಸೆಯಿಲ್ಲ ಕಲ್ಪನೆ ಚಳಿಗೆ ಮುದುರಿದೆ...
ಸದಾ ನಾ ಸೋಲೋ ಹುಡುಗಿ ಈ ಬೇಸರ ಮುಗಿಯೊಲ್ಲ
ಸದಾ ಗೆಲುವ ಕಾಲೆಳೆಯೋ ನನಗೆ ಈ ಸಂಜೆಯೇನು ಕೊನೆಯಲ್ಲ...
ಮುಟ್ಟಲಾಗದ ನಕ್ಷತ್ರಗಳ ಹಾಗೇ ಚಿತ್ರಿಸಿ ಮುತ್ತಿಕ್ಕುವೆ
ಕಟ್ಟಲಾಗದ ಮಹಲಿನ ಸುಖವನು ಹಂಚಿನ ಮನೆಯಲೇ ಕಲ್ಪಿಸುವೆ...
ಯಾರೂಕೇಳದ ಹಾಡ ನಾ ಗುನುಗುವುದಿಲ್ಲ
ಹಾಗೆಂದು ಬೋರ್ಗರೆದು ಅಳುತ್ತಾ ಕೂರೋದಿಲ್ಲಾ
ದೀಪವಿಲ್ಲದ ಕತ್ತಲೆಗೆ ಬಣ್ಣ ಹಚ್ಚುತ್ತೇನೆ... ಚುಚ್ಚುವ ನೋವುಗಳ ಹಿತವಾಗಿ ಕಿತ್ತು ಕವನ ಬರೆಯುತ್ತೇನೆ...
ಮತ್ತೆ ಗೆಲುವನ್ನು ಅಣಕಿಸುತ್ತಾ ನಾಳೆಯ ಸೋಲಿಗೆ ಕಾಯುತ್ತೇನೆ...
............................................................... ... ಮಧುಕುಮಾರ್.ಕೆ.ಆರ್.
- ಮಧುಕುಮಾರ್.ಕೆ.ಆರ್
26 Nov 2016, 05:13 pm
Download App from Playstore: