ಕುಳ್ಳ ಮೂರ್ತಿ
ಡೊಳ್ಳು ಹೊಟ್ಟೆ ಕುಳ್ಳ ಮೂರ್ತಿ
ಬಂದ ನೋಡಿರೊ !
ಒಂಟಿ ಕೋರೆ ಆನೆ ಮೊಗದ
ಚಂದ ನೋಡಿರೊ!
ಹರಿದ ಹೊಟ್ಟೆಗಾವು ಬಿಗಿದ
ಗಂಟು ನೋಡಿರೊ!
ಇಲಿಯ ಹತ್ತಿ ಸಾಗುತಿರುವ
ಕುಂಟು ನೋಡಿರೊ!
ಗೌರಿ ಮೈಯ ಬೆವರ ಮಗನ
ಸಿರಿಯ ನೋಡಿರೊ!
ದುಡಿದು ತಿಂಬ ರೈತ ಜನರ
ಸ್ವರವ ಕೇಳಿರೊ!
ಬಿತ್ತಿ ಬೆಳೆದ ಮೊದಲ ಜೀವಿ
ಚಲುವ ತಿಳಿಯಿರೊ !
ಸಕಲ ವಿದ್ಯೆಗಾದಿ ಪುರುಷ
ಒಲವ ಗಳಿಸಿರೊ!
ಮಣ್ಣ ಗುಣಕೆ ಬಣ್ಣ ಬಳೆದು
ಕಾಡಬೇಡಿರೊ!
ಕರಕಿ ಪತ್ರಿ ಕಡುಬು ಪ್ರಿಯನ
ಜಾಡನರಿಯಿರೊ!
ಗಣಕ ಮೀರೊ ವೇಗದೊಡೆಯ
ಗಣಪ ನೋಡಿರೊ!
ಬೆಡಗ ರೂಪ ತೊಟ್ಟುಕೊಂಡ
ಟೊಣಪ ಕಾಣಿರೊ !
ಚಂದ್ರಗೌಡ ಕುಲಕರ್ಣಿ
- ಚಂದ್ರಗೌಡ ಕುಲಕರ್ಣಿ
09 Dec 2016, 09:50 am
Download App from Playstore: