ಕಂದ ಮತ್ತು ಚಂದ್ರ
ಬಾನಿಗೊಂದು ಏಣಿ ಹಚ್ಚಿ
ಚಂದ್ರನನ್ನೆ ಮುಟ್ಟಿದೆ!
ಸುತ್ತ ಮುತ್ತ ಆಡುತಿರುವ
ಚುಕ್ಕೆ ಬಳಗ ತಟ್ಟಿದೆ !
ಬಿಸಿಲ ಧಗೆಗೆ ಬೆಂದ ಧರೆಗೆ
ತಂಪು ತರಲು ಕೇಳಿದೆ !
" ನಿನ್ನ ಹಿಂದೆ ಬಂದು ಬಿಡುವೆ
ಹೊರಡು ತಿರುಗಿ ನೋಡದೆ !
- ಎಂದ ಚಂದ್ರ ಬರಲೆ ಇಲ್ಲ
ಎಷ್ಟು ಕಾದ್ರು ಭೂಮಿಗೆ !
ಮತ್ತೆ ಏಣಿ ಹತ್ತಿ ಹೊರಟೆ
ಕರೆದು ತರಲು ಲಗುಬಗೆ !
ಕಾಲು ಜಾರಿ ಆಯ ತಪ್ಪಿ
ಕೆಳಗೆ ನಾನು ಬೀಳಲು !
ಏಕೆ ಚೀರಿಕೊಂಡೆ ಎಂದು
ಅಮ್ಮ ಬಂದು ಕೇಳಲು !
ಕನಸು ಕಂಡೆನೆಂದು ಹೇಳೆ
ಅಪ್ಪಿ ಮುತ್ತು ಕೊಟ್ಟಳು !
ಎಲ್ಲರೆದರು ಹೇಳಿ ಹೇಳಿ
ಹಾಸ್ಯ ಮಾಡಿ ನಕ್ಕಳು!
- ಚಂದ್ರಗೌಡ ಕುಲಕರ್ಣಿ
09 Dec 2016, 09:52 am
Download App from Playstore: