ಮೊದಲದಿನ
ಪಾಟಿಯ ಚೀಲ ಹೆಗಲಿಗೆ ಏರಿಸಿ
ನಡೆದಿದೆ ಮಗುವು ಠೀವಿಯಲಿ
ಕಂದಗು ಅಮ್ಮಗು ಒಳಗೇ ಕಸಿವಿಸಿ
ಹೇಗೋ ಏನೋ ಶಾಲೆಯಲಿ ||ಪ||
ಕಂದರದೆಲ್ಲಾ ಒಂದೇ ಅಳುಮುಖ
ಅಕ್ಕಪಕ್ಕದಾ ಬೆಂಚಿನಲಿ
ಟೀಚರಿಗಂತೂ ಹಿಡಿದಿಡಲಾಗದು
ಎಲ್ಲರ ಒಂದೇ ನೋಟದಲಿ
||ಪಾಟಿಯ ಚೀಲ ಹೆಗಲಿಗೆ ಏರಿಸಿ
ನಡೆದಿದೆ ಮಗುವು ಠೀವಿಯಲಿ||
ಕಣ್ಣಾಲಿಗಳು ತುಂಬಿ ಬಂದರೂ
ಅಳಲಾರದೆ ಮಗು ಕುಳಿತಿಹುದು
ಬಣ್ಣಬಣ್ಣದಾ ಆಟಿಕೆ ಕೈಯಲಿ
ಆಡಿಸಲಮ್ಮನು ಎಲ್ಲಿಹಳು
||ಪಾಟಿಯ ಚೀಲ ಹೆಗಲಿಗೆ ಏರಿಸಿ
ನಡೆದಿದೆ ಮಗುವು ಠೀವಿಯಲಿ||
ಗಂಟೆಯ ಸದ್ದಿಗೆ ಕೂಗುತ ಓಡಲು
ಗೇಟಲಿ ಅಮ್ಮನು ಕಂಡಿಹಳು
ಪುಟುಪುಟು ಹೆಜ್ಜೆಗೆ ಗೆಜ್ಜೆಯ ಸದ್ದಿಗೆ
ಅಮ್ಮನು ಮನದೇ ನಲಿದಿಹಳು
||ಪಾಟಿಯ ಚೀಲ ಹೆಗಲಿಗೆ ಏರಿಸಿ
ನಡೆದಿದೆ ಮಗುವು ಠೀವಿಯಲಿ||
- ಗುರುಮೂರ್ತಿ ಬಾಲಚಂದ್ರ ಮೆಹೆಂದಳೆ
19 Dec 2016, 03:53 am
Download App from Playstore: