ಪ್ರೀತಿಯ ಕನಸು
ಪ್ರೀತಿಯ ಬಲೆಯೊಳಗೆ ನಾನು,
ಇದು ಬದುಕೋ ಬಂಧನವೋ ಅರಿಯೆನು,
ಮನದ ಮನೆಯೊಳಗೇ ನೂರಾರು ಕನಸ ಹೊತ್ತು ತಂದಿಹುದು ಪ್ರೀತಿ,
ಕಾಣುವುದೇ ನಿನಗೆ ಕನಸು ನನಸಾಗುವುದೆಂಬ ನಂಬಿಕೆಯಲಿ ನಾ ಬದುಕುತಿರುವ ರೀತಿ,
ನನ್ನ ಕನಸಿನ ನನಸಿಗೆ ಉತ್ತರವು ನೀನು,
ಬಂದು ನೀನು ಮನದ ಕಗ್ಗಂಟನು ಬಿಡಿಸುವೆಯೇನು.
ತಿಳಿಯೆನು ನಾನು ಮಾಯೆಯು ಪ್ರೀತಿಯೋ ಇಲ್ಲ ನೀ ನನ್ನ ಸೆಳೆದ ರೀತಿಯೋ,
ಈಗ ನಿನ್ನ ಪ್ರೀತಿಯ ಬಾಹುಬಂಧನದಲ್ಲಿ ನಾನು,
ನನ್ನ ನೋವು ನಲಿವುಗಳಿಗೆ ಸಹಪಾಠಿ ನೀನು,
ನಾ ತೋರುವ ಒಲುಮೆಯನ್ನು ಸ್ವೀಕರಿಸುವೆಯೇನು,
ನನ್ನ ಕನಸುಗಳ ದಾರಿಗೆ ಜೊತೆಯೂ ನೀನು,
ನನಸುಗಳ ಹಾದಿಗೆ ದೀವಟಿಗೆಯ ಬೆಳಕನ್ನು ತೋರಲು ಬರುವೆಯೇನು.
ನೀ ನಗುತಾ ಬದುಕಿರಲು ನನ್ನೊಂದಿಗೆ, ಕಷ್ಟ ದುಃಖಗಳಿಗೆ ನಾ ಎದುರುವೆನೇನು,
ನಿನ್ನ ನಂಬುಗೆ ಮಮತೆಯ ಪ್ರೀತಿಯ ಬಿಟ್ಟು ಬೇರೇನೂ ಕೇಳೆನು ನಾನು, ನೀ ಕೊಡುವೆಯೇನು,
ನಿನ್ನ ಸೋಲು ಗೆಲುವುಗಳಿಗೆ ನಿನ್ನಡಗೂಡಿದ ಪಯಣಿಯು ನಾನು,
ನನ್ನ ಏಳು ಬೀಳುಗಳ ಜೊತೆ ಪ್ರೀತಿಯಿಂದ ಸೇರುವೆಯ ನೀನು,
ಹಿತವಾದ ಪ್ರೀತಿಯಲಿ, ಒಬ್ಬರನ್ನೊಬ್ಬರು ಸೋಲಿಸದ ರೀತಿಯಲಿ, ಜಗವ ನೋಡುತ ಜೊತೆಯಲಿ, ಸಿಹಿಗನಸ ಹೆಣೆಯುತ ಬದುಕಲಿ, ನಗುತಿರಲು ಜೊತೆಯಲಿ ಸೋಲಿಹುದೆ ನಮಗೆ ಜಗದಲಿ!
ಕೇಳುತಿಹುದು ಮನಸು, ಅರಸುತಿಹುದು ಕನಸು,
ಬೇಗ ಬಂದು ಸಂಥೈಸುವೆಯ ಇದು ಆಗುವುದೆಂದು ನನಸು.
- ಶ್ರೀಕಾವ್ಯ
22 Dec 2016, 10:16 pm
Download App from Playstore: