ಹೊಸವರ್ಷವೇ?

ಹೊಸ ದಿರಿಸು ಧರಿಸಿಲ್ಲ
ತರು ಲತೆಗಳಾವುವೂ,
ಕಳಕಂಠದಿನಿ ದನಿಯೋ,
ಮೌನ ಮುರಿದಿಲ್ಲ!

ತಣ್ಪುದನ ಬಿಡಲಿಲ್ಲ
ಹೇಮಂತನಿನ್ನೂ,
ಕಚಗುಳಿಯು ಬಿಟ್ಟಿಲ್ಲ
ಸೂರ್ಯನನ್ನೂ!

ಹೊದ್ದು ಮಲಗಿಹನೆಲ್ಲೋ,
ಆ ವಸಂತನು ಸುಖದಿ,
ಹೊತ್ತಿನ್ನೂ ಆಗಿಲ್ಲ ,
ಅವ ಬರಲು ಜಗದಿ!

ಎಲ್ಲೂ,ಸೃಷ್ಟಿಯೊಳಿಲ್ಲ,
ಹೊಸತನವು....ನೋಡೀ!
ಎಲ್ಲಿಂದ ಬಂದಿತೀ.....
ಹೊಸ ವರ್ಷವೋಡಿ!!??!!

ಪಶ್ಚಿಮದ ಬಿರುಗಾಳಿ,
ತಂಗಾಳಿಯಂತಿದೆ,
ಈ ಭ್ರಾಂತ ಚಿತ್ತರಿಗೆ,
ನಮ್ಮ ಪ್ರಜೆಗಳಿಗೆ!!

ಇನಿತಾದರೂ ಸಡ್ಡೆ,
ನಮ್ಮತನಕಿಲ್ಲ,
ಹೊಸವರ್ಷ ನೆಪವಾಯ್ತು,
ಕುಡುಕರಿಗೆ ಎಲ್ಲ!!

ಪಕ್ಕದೂರಲಿ ನಡೆವ,
ಯಾರದೋ ಮದುವೆಗೆ,
ನಮ್ಮ ಮನೆಯಲ್ಲೇಕೆ,
ಹಬ್ಬದಡಿಗೆ??!!??
ಮುಂಜಾನೆಗೂ ಮುನ್ನ,
ಕೋಳಿ ಕೂಗಿದರೇನು!?!
ಬಂದುಬಿಡುವನೇ ಸೂರ್ಯ,
ಆ ಮುಗಿಲಿಗೆ ???

ಸೃಷ್ಟಿ ತಾ ಚಿಗುರೊಡೆದು,
ಹಸಿರು ನಗೆ ಚೆಲ್ಲುತಿರೆ,
ಅದು ಕಾಣಿರೈ ನಮಗೆ
ಹೊಸ ವರ್ಷವು!
ಬಿಟ್ಟು ಬಿಡಿ ವ್ಯಾಮೋಹ,
ಸಲ್ಲ ...ಈ... ಆವೇಶ,
ಹೊಸವರ್ಷವಲ್ಲವಿದು,
ಹುಸಿ ಹರ್ಷವೈ!!!

- ಮಲ್ಲಿಭಾಗವತ್ ಗುಡಿಬಂಡೆ

01 Jan 2017, 10:57 pm

---

Download App from Playstore: