ಓ ಮೃದು ಮಲ್ಲಿಗೆ...
ಪ್ರಕೃತಿಯ ಸಿಂಚನದಲಿ
ನಲಿವ ಓ ಮೃದು ಮಲ್ಲಿಗೆ ,
ನಿನ್ನ ಮೈಗಂಧಕೆ
ಅದು ಸೂಸುವ ಕಂಪಿಗೆ
ನಶೆಯೇರಿತು ನಿಶೆಗೆ
ನಗುವ ಹಾಲ್ಗೆನ್ನೆಯಲಿ
ಮಿನುಗುವ ಬಿಳುಪ ಹೊಳಪನು
ಕಡ ಕೇಳಲು ಹಿಂಜರಿದ
ಆ ಪೂರ್ಣಿಮೆಯ ಒಡೆಯನು
ಕಣ್ಣಲಿ ಅರಳಿದ ಕಾಂತಿಗೆ
ಅದು ತೋರುವ ಚಂದಕೆ
ನಸುನಕ್ಕು ಹಿಗ್ಗಿದವು ಆ ತಾರೆಗಳು
ಆ ಮುಂಜಾವಲಿ
ಚೆಲ್ಲಿದ ಹಾಲ್ಬೆಳಕಲಿ
ವಯ್ಯಾರದಿ ನಲಿವ ತಿಳಿಗಾಳಿಗೆ
ಬಿಸುಪೇರಿತು ತಕ್ಷಣಕೆ
ನಿನ್ನ ಸೋಕಿದ ಆಕ್ಷಣಕೆ
ನಿನ್ನುಸಿರ ಇಬ್ಬನಿಯಲಿ
ಮಿಂದ ಹೂಗಳು
ಮೃದುವಾದವು ಮೆಲ್ಲನೆ
ಬಿರಿದು ನಕ್ಕವು ಗಲಗಲನೆ
ಸಿಗ್ಗಿನಲಿ ಕುಗ್ಗಿದ ಮೊಗದಲ್ಲಿ
ಕೆಂಪಾಗಿ ಅರಳಿದ ನಾಚಿಕೆಯಲ್ಲಿ
ತನ್ಮಯನಾದ ಆ ರವಿ
ಬೇಡಿದನು ರಂಗನು
ಚೆಲ್ಲಲು ಬಾನಂಗಳದಲ್ಲಿ
ಬಿರಿದ ತುಟಿಯ ಪಕಳೆಯಂಚಲಿ
ಜಿನುಗುವ ಜೇನನು ಸವಿಯಲು
ನಾಚಿತು ಆ ದುಂಬಿಯು
ಇಹವು ಪರವಾಯಿತು
ಪರವೇ ಇಹದೊಳರಳಿತು
ನಿನ್ನ ಪರಿವೆಯಲಿ ನನ್ನೇ ನಾ ಮರೆತೆ
ಇಹ ಪರದ ಸಾಂಗತ್ಯವ ತೊರೆದೆ
- Indushekar Chinivar
05 Jan 2017, 05:24 pm
Download App from Playstore: