ನಗುವ ಹೂವು
ಹಸಿರ ಎಲೆಗಳ ಮೇಲೆ
ನಗುವ ಹೂಗಳ ಕುರಿತು
ಬರೆಯಬೇಕಿದೆ ಕವನ
ಅರಿತು ಅವುಗಳ ಪಯಣ!!
ಗಿಡದಿ ಎಲೆಗಳು ಚಿಗುರಿ
ಎಲೆಯ ಒಡಲಲಿ ಮದುರಿ
ಜನನವಾಗಿದೆ ಮೊಗ್ಗು
ಅರಳಲು ಅವಸರ ಅದಕೆ!!
ಇಬ್ಬನಿಯ ಸ್ಪರ್ಷಕ್ಕೆ
ಬೆಚ್ಚಿ ಎಚ್ಚರಗೊಂಡು
ಉದಯ ರಾಗದ ರವಿಯ
ಕಿರಣಕೆ ಮೈ ಒಡ್ಡಿ ನಿಂದು!!
ಅರಳಿ ಸಂತಸದಿ
ಸುಗಂಧವನು ತಾ ಬೀರಿ
ಮಕರಂದ ಚಿಮ್ಮುತ
ಹರೆಯವ ಏರಿ!!
ವಿರಹದ ಬೇಗೆಯಲಿ
ಬಳಲಿ ತಾ ನೊಂದು
ಪ್ರಣಯದ ಬಯಕೆಯಲಿ
ಕೈ ಚಾಚಿ ನಿಂದು!!
ಪುಳಕವಾಯಿತು ತನುವು
ದುಂಬಿಯ ಸ್ಪರ್ಷಕೆ
ಬೆರೆತು ಹೋಯಿತು ಒಲವು
ಪರಾಗ ಸ್ಪರ್ಷದಿ!!
ಸಡಿಲವಾಗಿಹ ದಳವು
ಗಿಡದ ಬುಡದಲಿ ಉದುರಿ
ಅಡಿಯ ಬೇರನು ಸೇರಿ
ಮರಳಿ ಉದಿಸಲಿ ನಾಳೆ!!
- ಪಿ.ಜಿ.ಜ್ಯೋತಿ
09 Jan 2017, 03:20 pm
Download App from Playstore: