ಹೆಣ್ಣಿವಳು..
ಹೆಣ್ಣಿವಳು,
ಅಮ್ಮನ ಮಗಳಾಗಿ ಅವಳ ಹೆಜ್ಜೆಯ ಅನುಸರಿಸುವವಳು.
ಅಪ್ಪನ ಮಗನಾಗಿ ಅವನ ಕನಸಿನ ನನಸ ತಾನಾಗ ಬಯಸುವಳು.
ತಮ್ಮ ತಂಗಿಯ ಪ್ರೀತಿಗೆ ಬಾಗಿ ತಾನೇ ತಾಯಿಯಾಗುವಳು
ಅಣ್ಣ, ಅಕ್ಕನ ತಂಗಿಯಾಗಿ ಅಕ್ಕರೆಯ ತೋರುವಳು.
ಜೀವನ ಜೊತೆ ಸೇರಿ ಬರುವವನಿಗೆ ಮಡದಿಯಾಗುವಳು.
ಸೇರಿದ ಮನೆಗೆ ಮಗಳಾಗ ಬೇಕಾದವಳು.
ತನ್ನೊಡಲಲಿ ಹುಟ್ಟುವ ಕೂಸಿಗೆ ತನ್ನ ಜೀವವ ಮರೆತು ಜೀವ ತುಂಬುವವಳು.
ಪ್ರೀತಿಯಲಿ ಅನ್ನಪೂರ್ಣೆಯು ಆಗುವಳು, ಕಾಡಿಸಿದವರಿಗೆ ಕೊಲ್ಲುವ ಮಹಿಷಮರ್ದಿನಿಯೂ ಆಗಬಲ್ಲಳು.
ತಲೆ ಬಾಗಿ ನಿಂತಾಗ ಬೆಳಗಿನ ಶಾಂತ ಕಡಲು ಇವಳೇ, ಸಿಡಿದಾಗ ಇರುಳಿನ ಭೋರ್ಗರೆವ ಸಮುದ್ರ ರೂಪವು ಇವಳದೇ.
ಪರ್ವತದಷ್ಟು ಎಲ್ಲ ಕಷ್ಟ ನಷ್ಟವ ಸಹಿಸಿನಿಲ್ಲಬಲ್ಲವಳು, ಒಮ್ಮೆ ಉಕ್ಕಿದರೆ ಅಗ್ನಿ ಪರ್ವತದ ಲಾವರಸ ಇವಳು.
ಭೂ ತಾಯಿಯ ಸಹನೆಯವಳು ನೋವಲು ಸಲಹುವುದ ಬಲ್ಲಳು, ಅವಳ ಒಡಲ ಕಂಗೆಡಿಸಿ ಸಂತಸ ಪಟ್ಟರೆ ಬಾಯ್ದೆರೆದು ನುಂಗುವುದ ತಿಳಿದವಳು
ಮಳೆಯು ಇಳೆಯ ಕಾಪಾಡುವಂತೆ ಎಲ್ಲರನ್ನು ಕಾಯುವವಳು, ಅವಳನ್ನೇ ಅಳಿಸಿ ನಕ್ಕರೆ ಅತಿವೃಷ್ಟಿ ಅನಾವೃಷ್ಟಿಯಂತೆ ಕಾಡುವುದನು ಬಲ್ಲಳು.
ಹೆಣ್ಣಿವಳು
- ಶ್ರೀಕಾವ್ಯ
16 Jan 2017, 10:49 am
Download App from Playstore: