ಮೋಡ ಕವಿದ ಭಾವನೆ ಮಳೆ ಬರುವ ಸ
ಮೋಡ ಕವಿದ ಭಾವನೆ
ಮಳೆ ಬರುವ ಸೂಚನೆ
ಗುಡುಗು ಸಿಡಿಲುಗಳ ಆರ್ಭಟವಿಲ್ಲ
ಮಿಂಚಿನ ಸುಳಿವೂ ಇಲ್ಲ
ನವಿಲಿಗಿಲ್ಲ ನಿನ್ನ
ಕಾಣಲು ನಿರೀಕ್ಷೆ
ನದಿಗಳಿಗಿಲ್ಲ ನಿನ್ನ
ತುಂಬಿಕೊಳ್ಳುವ ಅಪೇಕ್ಷೆ
ಹಸಿರೆಲೆಗಳು ತೋರುತಿಹುದು
ನಿನಗೆ ತಾತ್ಸಾರ
ಹಕ್ಕಿಗಳು ಕೂಗುತಿಹುದು
ನಿನಗೆ ಬಹಿಷ್ಕಾರ
ಮಣ್ಣಿಗೇಕೋ ಬೇಡವಾಗಿದೆ
ನಿನ್ನ ಜೊತೆಗಿನ ಸ್ನೇಹ
ಮುಗಿಲಿಗೇಕೋ ತಿಳಿಯದು
ನಿನ್ನ ಹೊರಹಾಕುವ ಮೋಹ
ಮೋಡ ಕವಿದ ಭಾವನೆ
ಮಳೆ ಬರುವ ಸೂಚನೆ
ಗುಡುಗು ಸಿಡಿಲುಗಳ ಆರ್ಭಟವಿಲ್ಲ
ಮಿಂಚಿನ ಸುಳಿವೂ ಇಲ್ಲ
ಬತ್ತಿದ ಭೂಮಿಗೂ ಇಲ್ಲ
ನಿನ್ನ ಮೇಲೆ ಒಲವು
ಹೊತ್ತಿ ಉರಿಯುತಿಹ ಬೆಂಕಿಗೂ ಇಲ್ಲ
ನಿನ್ನಿಂದಾಗುವ ಸೋಲಿನ ಭಯವು
ನಿನ್ನೊಡಲಲ್ಲಿ ನೆಲೆನಿಲ್ಲಲು
ಕಾಮನಬಿಲ್ಲಿಗೆ ಬಿಗುಮಾನ
ನಿನ್ನ ಮಡಿಲಲ್ಲಿ ಕುಣಿದಾಡಲು
ತಂಗಾಳಿಗೆ ಅವಮಾನ
ತನ್ನ ಸ್ಥಾನವ ನಿನಗೆ
ತ್ಯಜಿಸಲು ಸಿದ್ದವಾಗಿದೆ ಗಗನ
ನಿನ್ನ ಬರುವಿಕೆಯ ಕಂಡು
ಹೆದರಿದಂತಿದೆ ಭುವನ
ಮುದುಡಿಹೋಗುವ ಯೋಚನೆ ಮಾಡಿದೆ ಹೂಗಳು
ನಿನ್ನ ಸ್ಪರ್ಶಕೆ ಹೆದರುತ
ನಿನ್ನ ಆರ್ಭಟವ ಸಹಿಸಲಾಗದೆ
ಸೂರ್ಯ ಕಿರಣಗಳಾಗಿವೆ ವ್ಯಥಿತ
ಇಷ್ಟು ದಿನ
ನನ್ನ ಮನ ನಿನ್ನ ಬರುವಿಕೆಯನ್ನೇ ಬಯಸಿದೆ
ಆದರಿಂದು
ನಿನಗಾಗಿ ಕಾದುಕಾದು ಹೃದಯ ಕೊರಗಿ ಕೆಂಡವಾಗಿದೆ
ನೀನೆ ಹೇಳು
ನನ್ನ ಈ ನಿರೀಕ್ಷೆಗೆ ನಿನ್ನೀ ಉಪೇಕ್ಷೆ ಸರಿಯಾದುದೇ?
- ಅಕವಿ
06 Feb 2017, 10:46 pm
Download App from Playstore: