ಪ್ರೀತಿ ಮಾಯೆ ಹುಷಾರು
ಸಂಜೆಯ ಸಮಯವದು
ಸಮುದ್ರದ ದಡವದು|
ನನ್ನ ನಿರೀಕ್ಷೆಯು ಅವಳಿಗದು
ಕ್ಷಣಗಳೆಲ್ಲಾ ಹತ್ತಾರು ಯುಗವದು||
ತಡೆಯಲಾಗದೆ ಆತುರ
ಹಲ್ಲಿನ ತುದಿ ಸೇರಿತ್ತು ನನ್ನ ನಖ|
ಅಂತೂ ದೂರದಿಂದಲೇ
ಕಂಡಿತು ಅವಳ ಮುಖ||
ಇಂದುಮುಖಿಯಾಗಿ ಬಂದವಳು
ಹೇಳಿದ್ದು ಒಂದೇ ಮಾತು|
ಮರೆತು ಬಿಡು ನನ್ನನ್ನು
ನಾನಿನ್ನು ಬೇರೆಯವನ ಸ್ವತ್ತು||
ಪ್ರತ್ಯುತ್ತರಕ್ಕೂ ಕಾಯದೇ
ಹೊರಟುಬಿಟ್ಟಳವಳು ಅಲ್ಲಿಂದ|
ಅಷ್ಟು ಸುಲಭದ ಮಾತಲ್ಲ
ತೆಗೆದುಹಾಕುವುದು ಅವಳನ್ನು ಹೃದಯದಿಂದ||
ಅವಳ ಮಾತನು ಕೇಳಿ
ತಾಕುವ ಮುನ್ನವೇ ಕಣ್ಣೀರು ನನ್ನ ಗಲ್ಲವ|
ಅವಸರಿಸಿ ಆಗಸವೇ
ಸುರಿಸಿತು ಕಂಬನಿ ತೋರುತ ಅನುಕಂಪವ||
ನಿಂತಂತಾಗಿ ಹೃದಯ
ಬದಲಿಗೆ ನಿಲ್ಲಿಸಿತು ಮಳೆಯ|
ಮೋಡಗಳ ಮರೆಯಿಂದ
ಮತ್ತೆ ಕಂಡ ಸಂಜೆಯ ಸೂರ್ಯ||
ನನ್ನ ಮನಸಿನ ಏರಿಳಿತವನ್ನು
ಅನುಕರಿಸಿತು ಸಾಗರದ ಅಲೆಗಳು|
ನನ್ನ ಆಳದೆದೆಯ ನೋವು
ಸೂರ್ಯನ ಸೇರಿ ಕೆಂಪಾದವು ಕಿರಣಗಳು||
ಮುಳುಗುವ ಸೂರ್ಯನಲ್ಲಿ ಕಾಣುತ್ತಿತ್ತು
ಅತೀವ ನೋವಿನ ವಿಷಾದ|
ಅಬ್ಬರದ ಅಲೆಗಳಲ್ಲಿ ಕೇಳುತ್ತಿತ್ತು
ಕಿವಿಗಡಚಿಕ್ಕುವ ಸಾವಿನ ನಿನಾದ||
ನನ್ನೆಲ್ಲಾ ಕನಸುಗಳು ಕರಗಿತು
ಮಂಜುಗಡ್ಡೆಯಂತೆ|
ನನ್ನೆಲ್ಲಾ ಆಸೆಗಳಿಗೆ ಕಿಡಿತಾಕಿ
ಉರಿಯಿತು ದಹಾವಾಲಿನಂತೆ||
ಪಶ್ಚಿಮದಂಚಿನಲ್ಲಿ ಬೆಳಕು
ಕಣೆಯಾಗಿ ಸೂರ್ಯನ ನುಂಗಿತು ಸಾಗರ|
ಆಗಸದಂಚಿನಲ್ಲಿ ಚಂದ್ರನು
ಉದಯಿಸಿ ಆಗಸವಾಯ್ತು ಬೆಳದಿಂಗಳ ಆಗರ||
ಇರುಳೆಂದರೆ ಬರೀ ಕತ್ತಲಲ್ಲ ಅಲ್ಲೂ ಬೆಳಕಿದೆ
ಎಂದು ತಿಳಿಯಿತು ಇಳಿದಾಗ ಪ್ರೀತಿ ಅಮಲು|
ಎಲ್ಲೇ ಇರಲಿ ಯಾರ ಜೊತೆಯೇ ಇರಲಿ
ಸುಖವಾಗಿ ಇರಲಿ ಎಂದೆಂದಿಗೂ ಅವಳು||
- ಅಕವಿ
15 Feb 2017, 05:58 pm
Download App from Playstore: