ಸಂಗಮ
ಮೋಡ ಮಳೆಯಾಗಿ ಸುರಿದು
ನೀರು ಅಲೆಯಾಗಿ ಹರಿದು|
ಕೆರೆ-ಕಟ್ಟೆಗಳ ಸರಿದು
ನದಿಯನ್ನು ಸೇರುವುದೇ ಸಂಗಮ||೧||
ಮಳೆಯಾಗಿ ಬಂದ ನೀರು ಅಲೆಯಾಗಿ
ಅಲೆಯಾಗಿ ಬಂದ ನೀರು ಕಳೆಯಾಗಿ|
ಕಳೆ ಹಚ್ಚ-ಹಸಿರ ಬೆಳೆಯಾಗಿ
ಫಸಲು ನೀಡುವುದೇ ಸಂಗಮ||೨||
ಸೂರ್ಯ ಹಗಲು ಹುಟ್ಟಿದರೂ
ಚಂದಿರ ರಾತ್ರಿ ಹುಟ್ಟಿದರೂ|
ಅಮಾವಾಸ್ಯೆ ಚಂದಿರನ ಮರೆಮಾಡಿದರೂ
ಜಗಕೆ ಬೆಳಕು ಇರ್ವರ ಸಂಗಮ||೩||
ಸಮುದ್ರ ವಿಶಾಲವಾಗಿದ್ದರೂ
ದ್ವೀಪ ಚಿಕ್ಕದಾಗಿದ್ದರೂ|
ಕರಾವಳಿ ತೀರ ತಂಪಾಗಿದ್ದರೂ
ಉಪ್ಪು ತನ್ನಲ್ಲಿ ವಿಲೀನವಾಗಿರುವುದೇ ಸಂಗಮ||೪||
ಗಾಳಿಯು ಹಗುರವಾಗಿದ್ದರೂ
ಮಳೆಯನ್ನು ಭುವಿಗೆ ತಂದು|
ಮರ-ಗಿಡ ಹಸಿರಾಗಿಸಿ
ಶುದ್ಧಗಾಳಿಯನ್ನು ನೀಡುವುದೇ ಸಂಗಮ||೫||
ದೇಹಗಳು ಎರಡಾದರೂ
ಮನಸ್ಸು ಒಂದೆಂಬಂತೆ|
ಜೊತೆಯಾಗಿ ಬಾಳಲು ಆಗದಿದ್ದರೂ
ಸತ್ತರೂ ಕಥೆಯಾಗಿ ಉಳಿಯುವುದೇ ಸಂಗಮ||೬||
ದೇಶಗಳು ಎರಡಾದರೂ
ಪ್ರಪಂಚ ಒಂದೆಂಬಂತೆ|
ಏಕತೆಯ ಮನೋಭಾವದಿಂದ
ಎಲ್ಲರೂ ಒಟ್ಟಾಗಿ ಬಾಳುವುದೇ ಸಂಗಮ||೭||
ಕಣ್ಣುಗಳು ಎರಡಾದರೂ
ಕನಸ್ಸು ಒಂದೆಂಬಂತೆ|
ಗುರಿಯೆಡೆಗೆ ಸಾಗಲು
ಮನಸ್ಸು ಮಾಡುವುದೇ ಸಂಗಮ||೮||
ಬೇಡದೆ ಪಡೆದ ವರ ಜನನ
ಬೇಡಿದರೂ ತಪ್ಪದು ಮರಣ|
ಎಷ್ಟು ತಿಳಿದರೂ ತಿಳಿಯದು ಜೀವನ
ಆದರೂ ಜೀವನವು ಸುಖ-ದುಃಖಗಳ ಸಂಗಮ||೯||
- ಕೆ.ಕೆ.ನಂದಾದೀಪ್(ಕೋಲಾರದ ಕಂದ)
16 Feb 2017, 08:48 pm
Download App from Playstore: