ಮೊದಲ ಭೇಟಿ
ಮೌನ ಗೌರಿ ಮನೆಗೆ ಬಂದ ದಿನವೇ
ಪಾರಿವಾಳ ಹಾರಿ ಹೋದ ಕ್ಷಣವೇ!!
ಮನದಲ್ಲೀ ಮೂಡಿದ್ದ ಆ ರೂಪ
ಕಣ್ಣೆದಿರು ಬಂದಾಗ ಸಂಕೋಚ!!
ಹೂ ಬಳ್ಳಿ ತಲೆ ಬಾಗಿ ನಿಂತಂತೆ
ನಾ ನಿಂತೆ ಅವನೆದಿರು ಇದೇ ಮೊದಲು!!
ನನಗೇಕೆ ಈ ನಡುಕ ಈ ಬೆವರು
ಉಸಿರಿನ ಏರಿಳಿತ ಅದಲು ಬದಲು!!
ಮುಗಿಲೊಮ್ಮೆ ಹೆಗಲೇರಿ ಕುಳಿತಂತೆ
ತಲೆ ಎತ್ತಿ ನೋಡುವುದ ನಾ ಮರೆತೆ!!
ಇಂದೇಕೆ ನನ್ನಲ್ಲಿ ಈ ದಿಗಿಲು
ಮಾತನ್ನೇ ಮರೆಸಿಹುದೇ ಈ ಹಗಲು!!
ಮಧು ಮಗಳು ನಾನಾಗಿ ನಿಂತಿರಲು
ಜೊತೆಯಾಗ ಬಂದಿಹನು ಬದುಕಿನೊಳು!!
ವಿಪರೀತ ಮಿಡಿತ ಈ ಹೃದಯದೊಳು
ನವ ಒಲವ ಬರೆಯುತಲಿ ಬಯಕೆಗಳು!!
- ಪಿ.ಜಿ.ಜ್ಯೋತಿ
19 Feb 2017, 12:03 pm
Download App from Playstore: