ನೂರ್ ಕಾವ್ಯ-೧

ನೂರ್,
ಮೌನ ಕತ್ತಲಾದರೆ
ಮಾತು ಬೆಳಕು..!
*
ನೂರ್,
ಅವಳೆದೆಯೂರಿಗೆ ನನ್ನ
ಕನಸಿನ ಪಯಣ ನಿರಂತರ
ಇರೋದು ಮಾತ್ರ ಒಂದಿಷ್ಟು
ನಿದಿರೆಗಳ ಅಂತರ!
*
ನೂರ್,
ವಿರಹವನ್ನು ನಾ ಪ್ರೀತಿಸಿಲ್ಲ
ವಿರಹ ನನ್ನನ್ನು
ಬಿಟ್ಟುಕೊಡುತ್ತಿಲ್ಲ ಅಷ್ಟೇ
*
ನೂರ್,
ನಿನ್ಹೆಸರಲ್ಲಿ ಮಹಲ್
ಕಟ್ಟಿರುವೆ ತೋರಿಸ ಬರಲೆಂದರೆ
ಹದಿಮೂರು ಕಲ್ಲುಗಳ ಅಡಿಯಲ್ಲಿರುವೆ.!
*
ನೂರ್,
ಪಡೆದ ಒಂದೇ ರೋಜಾ
ಜೋಪಾನ
ಗೋರಿಗೆ ಬೇಕಾಗಿದೆ
*
ನೂರ್,
ಇಂತಿಷ್ಟೇ ಪ್ರೀತಿಸಬೇಕೆಂದು
ಕರಾರು ಮಾಡದ್ದು ನಿನ್ನ ತಪ್ಪು
ನಾ ವಿರಹಿ!
*
ನೂರ್,
ಎದೆ ಬಡಿತದಲ್ಲಿ
ಹೆಸರು ಮಿಡಿಯುವುದಕ್ಕೂ
ಸುಂಕ ಕೇಳದಿರು
ಮೊದಲೇ ಸಾಲಗಾರ.!
*
ನೂರ್,
ನಿನ್ನ ಅತ್ತರಿನ
ಘಮದೊಳಗೆ
ನನ್ನಂದಿನ ಬೆವರ
ವಾಸನೆ ಮಾಸಿಹೋಗಲಿ
*
ನೂರ್,
ನೀ ಬೊಟ್ಟು ಮಾಡಿದ
ದಾರಿಯಲ್ಲೇ ಮಸಣವಿದೆ.!
*
ನೂರ್,
ಪಾದವನ್ನಿಟ್ಟು
ಕನಸೊಳಗೆ ಕಾಲಿಡು
ಕಾಲ್ಗಿತ್ತು ಓಡದಂತೆ
ಕನಸ್ಸಲ್ಲಾದರೂ ಹಿಡಿದಿರುವೆ
*
ನೂರ್,
ಎದೆಗೀರಿನ ಲೆಕ್ಕ
ಸರಿಯಾಗಿ ನೆನಪಿಡು
ಕನಸ್ಸಲ್ಲೇ ತೀರಿಸಲಿದೆ
*
ನೂರ್,
ನನ್ನ ಕನಸೆಲ್ಲ
ಸತ್ತಿದ್ದು ಮೊದಲು
ನೀ ಮೆಹಂದಿ
ಮುಟ್ಟಿದಾಗ.!

ಅವಿಜ್ಞಾನಿ

- ಅವಿಜ್ಞಾನಿ

26 Feb 2017, 08:27 am

---

Download App from Playstore: