ಅಂತಿಮ ಸಾಲುಗಳು
ಹೇ ಗಾಲಿಬ್ ಸಂಗಡಿಗರೇ,
ಮಸಣದೂರಿಗೆ ದಿಬ್ಬಣ ಕಟ್ಟಲು
ಅವಳದೊಂದು ಹೂ ಕೀಲಿ ಇಡಿ
ಜಡೆ ಸಂಧಿಯಲ್ಲಿ ಎಂದಿಗೂ
ಬಾಡದಿರುವ ಮುಷ್ಠಿಯಷ್ಟಿರುವುದು
ಕೊಟ್ಟು ಬಂದಿರುವೆ
**
ಕಡಲೂರಿನವಳು ಅಲೆಗಳಂತೆ
ಕುಣಿಯುತ್ತಾಳೆ ತುಸು ಸಾವಧಾನ ನಿಮಗಿರಲಿ
ಜೋರು ಮಾಡುವ ಜರೂರತ್ತೇನು ಇಲ್ಲ
ಮೆಹರ್ ಕೇಳುವ ದಿನವೇ ಬಹುಶಃ
ಅವಳೇ ಕೊಡಬಹುದು ತಾಳ್ಮೆ ನಿಮಗಿರಲಿ
**
ತೂತು ಮನಸಿನ ಫಕೀರನ ಗೋರಿ
ಸದ್ಧು ಮಾಡುತ್ತಿದೆ ಅಂದು ಬಿಡಿ
ಗಡಿಬಿಡಿಯಲ್ಲಿ ಕೊಡುವಳು ಅವಳೋ
ಅನಾಮತ್ತಾಗಿ ತಿರಸ್ಕರಿಸಿ ಹೋದವಳು
ಕರುಣೆ ನಿಮಗಿರಲಿ
**
ಅವಳೆದುರು ಹೆಸರನ್ನೇನು ಕರೆಯದಿರಿ
ಮುಂಗುರುಳಿನ ಅಡಿ ಹುಬ್ಬಿನ
ನಿರ್ದಿಷ್ಟ ಬಲಗಡೆ ಮಚ್ಚೆಯನ್ನು
ಅರಿವಿಲ್ಲದೇ ಮುಟ್ಟುವಳು
ಗುಳಿಕೆನ್ನೆಗೆ ನನ್ನ ಮುತ್ತು ಬೀಳುತ್ತಿದ್ದದ್ದೇ ಅಲ್ಲಿಗೆ
ನೋಟ ತಿರುಗಿಸುವ ಗುಣ ನಿಮ್ಮಲ್ಲಿರಲಿ
ಅವಿಜ್ಞಾನಿ
- ಅವಿಜ್ಞಾನಿ
27 Feb 2017, 07:48 am
Download App from Playstore: