ಲೆಕ್ಕ ತಪ್ಪಿದ ಅಲೆ
ಸೆರಗ ನೆರಿಗೆಯಲ್ಲಿಟ್ಟ ಮೊಹಬ್ಬತ್ತನ್ನು ಬಿಡಿಸುವ ನನ್ನ ಉಮೇದಿಗೆ ಅವಳೊಂದು ಕಿರು ನಗೆಯಿಟ್ಟು ಮಾಯಿಸುತ್ತಾಳೆ
ಮದಿರೆಯಂತಹ ನನ್ನ ಹೊಗಳಿಕೆಯ
ಅಮಲಿನ ಧಾವಂತಕ್ಕೆ ನಾಚುವುದು
ಮರೆಚುತ್ತಾಳೆ ಹಾಗೆಯೇ
ಎಳೆಯಲಣುವಾದ ಎದೆ ತೇರಿನ
ಮುಹೂರ್ತವೆಲ್ಲಾ ಕನಸಿನಲ್ಲೇ ಆಗುತ್ತದೆ
ಎಣಿಕೆಗೆ ಸಿಗದ ನಭದೂರಿನ ಚುಕ್ಕಿಯವಳು ಮಿನುಗುತ್ತಾಳೆ ಮುತ್ತಿಟ್ಟಷ್ಟು
ಕಾವಲು ಹೃದಯದ ಕಿಮ್ಮತ್ತಿಲ್ಲದ ಒಲೈಕೆ ಕತ್ತಲಂತೆ ಸರಿದು ಹೋಗುತ್ತದೆ ಗೊತ್ತಾಗದೆ
ವಾಸ್ತವ ಒಲವಿನ ತಲಾಶೆಯ ಕೊನೆ ಇಶ್ಕ್ ಎಂದಾಗಲು ಕಡಲಲೆಯನ್ನು ಉಪಮೆಯಾಗಿಸುತ್ತೇನೆ
ಅವಳೊಳಗಿನ ಹುಣ್ಣಿಮೆ ನಾನಾಗಿರಬೇಕು ಉಬ್ಬಿಬಿಡುತ್ತೇನೆ ಕಂಡಾಗಲೆಲ್ಲ
ಮುಗಿಲೂರಿನ ಸರಕನ್ನು ಅಂಗೈಯಲ್ಲಿಟ್ಟು
ಮುದ್ದಾಡಿಸುವ ನನ್ನ ಪ್ರಬಲ ಆಸೆಯೊಂದು ಟಿಸಿಲೊಡೆಯುವುದು ಆವಾಗಲೇ
ಹೆಜ್ಜೆ ಜಾಡಿನ ಪರಾಮರ್ಶಿಸುವ ನನ್ನ ವಯಸ್ಸಿನ ಪರಿಧಿ ಗೊತ್ತಿಲ್ಲದೇ ಪ್ರಬುದ್ಧವಾಗುತ್ತದೆ ಸುದ್ಧಿಯಿಲ್ಲದೇ
ಅವಿಜ್ಞಾನಿ
- ಅವಿಜ್ಞಾನಿ
23 Mar 2017, 12:50 am
Download App from Playstore: