ಪರಮ ರಹಸ್ಯ
ಆಕಸ್ಮಾತ್ ನಿನ್ನೊಳಗೆ ಅನಾವಶ್ಯಕ
ನೆನಪೊಂದು ಹುಟ್ಟಿಕೊಂಡರೆ
ನನ್ನ ದೂಷಿಸದೇ ಕಳೆದ ಕಾಲವ
ಮೆಲ್ಲ ಮೆಲುಕು ಹಾಕು ಕಾಡ ಹೂವು ಮುಡಿದ
ಜಡೆಯ ನೀಳ ಮೂಡಿಯೊಂದು ಈಗಲೂ ನಾ
ತೊಟ್ಟ ಬಟ್ಟೆಗೆ ಸಿಕ್ಕಿಕೊಂಡಿದ್ದು ನೀ ಅರಿಯದ ರಹಸ್ಯ
ಗಿಡಗಂಟಿ ಮೆಟ್ಟಿ ಕೀಳುವಾಗ ಸೋರಿದ ರಕ್ತಕ್ಕೆ
ನಾ ಹೇಳಿದ ನೆಪ ಕಿವಿ ಮೇಲಿಟ್ಟ ಹೂವೆಂದ ನೀ
ತಿರುಗಿ ನನಗೆ ಕೊಟ್ಟು ಹೋದದ್ದು
ಶ್ವಾಸಿಸುತ್ತಿರುವ ಘಮಕ್ಕೂ ವ್ಯತ್ಯಾಸ ತಿಳಿಯದಂತೀಗ
ಇನಿಯನ ಜತೆಯಾಗಿ ಕಾಡ ದಾರಿ ಬರುವಾಗ
ನಮ್ಮ ಹೆಜ್ಜೆ ಜಾಡುಗಳ ಒರೆಸುತ್ತಿರು
ಒಂದೊಮ್ಮೆ ಕೂಗಿದ ಹೆಸರು ಬಂಡೆ ಅಂಚಲಿ
ಕೇಳುತ್ತದೆ ನನಗೆ ಅದೂ ನೀ ತಿಳಿಯದ ಪರಮ ವಿಪರ್ಯಾಸ
ಯಾರೋ ಬಿತ್ತಿಟ್ಟ ಬೀಜದೊಳಗಿಂದ
ಮೊಳಕೆ ಒಡೆದ ಚಿಗುರಿನೊಳಗೆ
ಪರಾಗ ಸ್ಪರ್ಶದ ಕ್ರಿಯೆಗೆ ಚಾಲ್ತಿ ಮಾಡಿದ್ದಾದರೂ ನೀ ಹೇಳದೇ ಬಿಟ್ಟು ಹೋದ ಕಠಿಣ ಸತ್ಯ
ನಿನ್ನೆ ನಾಳೆಗಳ ಲೆಕ್ಕ ತಪ್ಪಿದ ಅಲೆಗಳ
ನಡುವೊಂದು ಮೌನ ಹುಟ್ಟೋದು
ಅರ್ಥವಿಲ್ಲದೇ ಕಣ್ಮರೆಯಾಗಿಬಿಡಲಿ
-ಹಲ್ಕಾ ಕವಿತೆ
ಅವಿಜ್ಞಾನಿ
- ಅವಿಜ್ಞಾನಿ
06 Apr 2017, 10:10 pm
Download App from Playstore: