ಅವನ ನವೆ
ಮೌನ ಹುಟ್ಟಿದ ರಾತ್ರಿಯಲ್ಲಿ
ಕಂದೀಲು ನೆತ್ತರ ಕಾರಿ
ಕೆಂಪಾಗುತ್ತದೆ
ನೆತ್ತಿ ಬೊಟ್ಟಿನಲ್ಲಿ ಮಾತಿನ ಬುತ್ತಿ
ತೆರೆಯದ ಖಾತೆ ಉಳಿಸಿಕೊಂಡಿದೆ
ಕೆನ್ನಾಲೆಗಳು ವಿರಹಗೀತೆ
ಹಾಡುವಾಗ ಮುಂಗುರುಳು
ಗಾಳಿಯನ್ನು ಮುತ್ತುತ್ತಿರುತ್ತದೆ
ಕಾಜುಗಳ ತರಹೇವಾರಿ ನಿನಾದಗಳಿಗೆ
ಕಾರ್ಗತ್ತಲೂ ಹದಿಹರೆಯವಾಗುವುದು ಗೊತ್ತಾಗದೇ
ಅವನ ಹೆಸರ ನವೆಯೊಂದು
ಪುಳಕ ಹುಟ್ಟಿಸಿ ಪರಾರಿಯಾಗುವಾಗ
ಒಣಗಿದ ತುಟಿಯಿಂದ ಮಾತುಗಳ
ಬಹಿಷ್ಕಾರವಾಗುತ್ತದೆ
ಹುಬ್ಬುಗಳು ಆಲಿಂಗನ ಬಯಸಿದ್ದು
ನೆಟ್ಟ ದೃಷ್ಟಿಯ ವಂಚಿಸಿ ನಡೆದ
ಆಚಾತುರ್ಯ ಕಾರ್ಯಕ್ರಮ
ಎಡೆಬಿಡದೆ ಕಾಡುವ ನೆನಪುಗಳ
ಅಲೆಗೆ ಕಾಡಿಗೆಯ ಉತ್ತರ
ಮರೀಚಿಕೆಗೆ ಬಯಕೆಗೊಂದು
ಹೊಸ ಆಯಾಮ
ಅವಿಜ್ಞಾನಿ
- ಅವಿಜ್ಞಾನಿ
17 Apr 2017, 07:03 pm
Download App from Playstore: