ಹಾಸು ಬೆನ್ನಿಗೊಂದು ಮುತ್ತು
ಅವಳ ಮೊದಲ ಮುಟ್ಟು ನಿಂತಾಗ
ಗಂಡನಲ್ಲಿ ಹುಟ್ಟುವ ಅಸಂಖ್ಯ
ಆಸೆಗಳಿಗೆ ಹೆಸರೇನೂ ಇರುವುದಿಲ್ಲ
ಸ್ತ್ರೀ ಸಮುದಾಯವೇ,
ಇವ ಯಾವತ್ತೂ ದೇವರಾಗಬಲ್ಲ ಕಲ್ಲು
*
ಹೊಟ್ಟೆ ಉಬ್ಬುವ ಪ್ರತಿದಿನವು
ಮನಸ್ಸಿನಲ್ಲಿ ಲೆಕ್ಕ ಹಾಕುತ್ತಾನೆ
ತನ್ನದೇ ಪ್ರತಿರೂಪ ಹುಟ್ಟಬೇಕೆಂಬ
ಇರಾದೆ ವ್ಯಕ್ತಪಡಿಸದೇ ಇರಿಸಿಕೊಳ್ಳುತ್ತಾನೆ
*
ನೀವು ಕೂಸಿನಿಂದ ತಿನ್ನುವ ಪ್ರತಿ
ಒದೆಗೂ ಎದೆ ನೀಡಬೇಕೆಂದು
ಆಶಿಸುವವನು ಇವನೇ
ಮಹಿಳೆಯರೇ
ನಿಮ್ಮ ನೋವ ನೋಡಿ ನಗುವುದಲ್ಲ ಅವನು
ತನ್ನ ಕಂದನ ಪರಾಕ್ರಮಕ್ಕೆ ಮುಗುಳುತ್ತಾನೆಯಷ್ಟೇ
*
ಹೆರಿಗೆ ವಾರ್ಡಿನಲ್ಲಿ ನಿಮ್ಮ ಯಾತನೆ
ಡೆಲ್ಟಾ ಮಾಪಕದಲ್ಲಿ ಅಳೆಯುತ್ತಾರೆ
ಗರ್ಭಧಾರಿಣಿಗಳೇ,
ಹಾಸು ಬೆನ್ನಿಗೆ ಮುತ್ತನಿಟ್ಟ ಇವನ
ದರ್ದು ಅಳೆಯುವ ಮಾಪಕ
ಇನ್ನೂ ಕಂಡುಹಿಡಿದಿಲ್ಲ..!!
-ಅವಿಜ್ಞಾನಿ
- ಅವಿಜ್ಞಾನಿ
29 Apr 2017, 10:08 am
Download App from Playstore: